Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
ДУШАНБЕ, 29.08.2025 /АМИТ «Ховар»/. Сиёсати Тоҷикистон дар самти идоракунии ҳамгироёнаи захираҳои об, ташаббусҳои байналмилалӣ, аз ҷумла, дар соҳаи об ва ҳифзи пиряхҳо дар гӯшаи Тоҷикистон, ки дар доираи «Ҳафтаи ҷаҳонии об» аз аз 24 то 28 августи соли 2025 дар шаҳри Стокҳолми Шоҳигарии Шветсия баргузор гардид, муаррифӣ карда шуд.
АМИТ «Ховар» бо истинод ба Вазорати энергетика ва захираҳои оби Тоҷикистон иттилоъ медиҳад, ки дар «Ҳафтаи ҷаҳонии об» аз Тоҷикистон муовини якуми Вазири энергетика ва захираҳои оби Ҷумҳурии Тоҷикистон Ҷамшед Шоимзода иштирок намуд.
Гӯшаи Тоҷикистон дар доираи «Ҳафтаи ҷаҳонии об» бо ташаббуси Вазорати энергетика ва захираҳои оби Ҷумҳурии Тоҷикистон таъсис дода шуда, ҳадафи он муаррифии сиёсати Тоҷикистон дар соҳаи об дар арсаи байналмилалӣ, инчунин ҳадаф ва вазифаҳои Конфронси чоруми байналмилалии Душанбе оид ба Даҳсолаи байналмилалии амал «Об барои рушди устувор, солҳои 2018–2028» буд.
Дар доираи «Ҳафтаи ҷаҳонии об» ҷаласаи навбатии Кумитаи байналмилалии машваратии Раванди оби Душанбе баргузор гардид. Дар он масъалаҳои марбут ба Конфронси чоруми Душанбе, аз ҷумла ҳадафҳо, вазифаҳо ва харитаи роҳ мавриди муҳокима қарор гирифтанд.
Инчунин бо ташаббуси Вазорати энергетика ва захираҳои оби Ҷумҳурии Тоҷикистон, Вазорати замин, инфрасохтор, нақлиёт ва сайёҳии Ҷопон, Панели коршиносону роҳбарони сатҳи баланд оид ба масъалаҳои об ва офатҳо (HELP) ва Маркази рушди минтақавии Созмони Милали Муттаҳид (UNCRD)/UNDESA таҳти унвони «Об ва офатҳо: аз пирях то баҳр» ҷаласаи сатҳи баланд баргузор шуд.
Дар ин чорабинӣ Ҷамшед Шоимзода натиҷаҳои Конфронси байналмилалии сатҳи баланд оид ба ҳифзи пиряхҳоро, ки аз 29 то 31 майи соли 2025 дар шаҳри Душанбе баргузор гардид, муаррифӣ намуд. Таъкид шуд, ки хулосаҳо ва тавсияҳои ин конфронс заминаи муҳим барои таҳияи роҳҳалу сиёсати муштарак дар самти обшавии пиряхҳо дар сатҳи байналмилалӣ, таҳкими ҳамкорӣ ва омодагӣ ба Конфронси Созмони Милали Муттаҳид оид ба об дар соли 2026 мебошанд.
Иштироки фаъоли Ҷумҳурии Тоҷикистон дар чорабиниҳои «Ҳафтаи ҷаҳонии об» бори дигар нақши калидии мамлакати моро дар пешбурди ташаббусҳои глобалӣ дар соҳаи ҳифзи пиряхҳо, рушди ҳамкории минтақавӣ ва идоракунии устувори захираҳои об таъкид намуд.
АКС: Вазорати энергетика ва захираҳои оби Ҷумҳурии Тоҷикистон
Дар Душанбе савдои фаромарзии бекоғаз ва экосистемаи рақамии тиҷорати электронӣ баррасӣ гардид
Ҷаласаи нахустини гурӯҳи кории Тоҷикистону Русия оид ба ҳамкорӣ дар соҳаи рақамикунонӣ ва технологияҳои иттилоотӣ баргузор гардид
Иқтисодчиён дар ҳалли масъалаҳои рушди иқтисодӣ ва иҷтимоии Тоҷикистон нақши барҷаста доранд
Дурнамои ҳамкории иқтисодии Тоҷикистон бо Хазинаи байналмилалии асъор баррасӣ гардид
Дар Вазорати рушди иқтисод ва савдо ба муносибати Рӯзи иқтисодчиён ҳамоиши тантанавӣ доир гардид
Тоҷикистон ва Иттиҳоди Аврупо дар самти рақамикунонии иқтисод ва идоракунии давлатӣ ҳамкориро тақвият медиҳанд
Тоҷикистон ва Иттиҳоди Аврупо ҳамкориро дар соҳаи ҳифзи муҳити зист тақвият мебахшанд
ИМРӮЗ — РӮЗИ ИҚТИСОДЧИЁН. То соли 2030 ҳаҷми маҷмӯи маҳсулоти дохилӣ 1,8 маротиба афзоиш дода мешавад
Дар шаҳру ноҳияҳои Хатлон корҳои безараргардонӣ бар зидди малах идома доранд
Ба кормандони Хадамоти гумруки Тоҷикистон тақвияти чораҳои зиддикоррупсионӣ тавзеҳ дода шуд
Дар Тоҷикистон дар беш аз 23 ҳазор гектар пунбадона кишт намудаанд
«ДОЛОНИ САБЗ». Роҳи «Данғара-Гулистон» дар доираи ин барнома навсозӣ карда мешавад
