35-СОЛАГИИ ИСТИҚЛОЛИ ДАВЛАТӢ. Дар шаҳру деҳоти Исфара корҳои ободонию созандагӣ вусъат меёбанд

ДУШАНБЕ, 24.09.2025. /АМИТ «Ховар»/. Ба истиқболи ҷашни 35-солагии Истиқлоли давлатии Ҷумҳурии Тоҷикистон дар шаҳру деҳоти Исфара корҳои ободонию созандагӣ вусъати тоза мегиранд. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Дар Ҷамоати деҳоти Чоркӯҳи шаҳри Исфара сохтмони Парчами давлатии Ҷумҳурии Тоҷикистон, маркази хизматрасонӣ, коргоҳи дӯзандагӣ, мактабҳо, майдончаҳои варзишӣ ва дигар иншооти муҳими иҷтимоӣ идома дорад.

Иттилоъ дода шуд, ки дар ин ҷамоат сохтмони бинои Муассисаи таҳсилоти миёнаи умумии №79 низ идома дорад. Инчунин дар шаҳраки Шуроб бо саҳми соҳибкор Муассисаи таҳсилоти миёнаи умумии №8, ки соли 1949 бунёд карда шудааст, пурра навсозӣ мегардад.

Муассиса дорои 15 синфхонаи барҳаво буда, барои 560 хонанда пешбинӣ гардидааст. Бо ташаббуси соҳибкор дар мактаб 4 кабинети фаннӣ бо таҷҳизоти замонавӣ, 3 озмоишгоҳ, ошхона, китобхона, маркази омӯзиши ҳунар барои писарону духтарон, майдончаҳои варзишӣ ва маркази инкишофи кӯдак бунёд карда мешавад.

АКС: Хадамоти матбуоти Раиси вилояти Суғд