Дар шаҳри Ганҷа ҷаласаи Шурои рушди тарбияи ҷисмонӣ ва варзиши кишварҳои ИДМ баргузор гардид

ДУШАНБЕ, 30.09.2025. /АМИТ «Ховар»/. Дар доираи Бозиҳои сеюми кишварҳои аъзои Иттиҳоди Давлатҳои Мустақил 29 сентябр дар шаҳри Ганҷаи Озорбойҷон ҷаласаи Шурои рушди тарбияи ҷисмонӣ ва варзиши ин давлатҳо бо роҳбарии намояндагони соҳаи варзиши кишварҳои аъзо доир гардид. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар ҷаласаи Шуро ҳайати Ҷумҳурии Тоҷикистон бо роҳбарии муовини Раиси Кумитаи кор бо ҷавонон ва варзиш Муҳаммадтолиб Шокирзода иштирок намуд.

Зимни баррасии масъалаҳо иштирокдорони ҳайатҳои кишварҳо оид ба ҳамкории густурда ва иҷрои саривақтии бандҳои дахлдори Нақшаи чорабинии Шуро барои солҳои 2024-2026 сухан гуфтанд.

Пас аз ҷамъбасти ҷаласаи Шурои рушди тарбияи ҷисмонӣ ва варзиши кишварҳои аъзои Иттиҳоди Давлатҳои Мустақил роҳбарони ҳайатҳо маконҳои таърихию фарҳангии шаҳри Ганҷаи Ҷумҳурии Озорбойҷон, аз ҷумла муҷассамаи роҳбари умумимиллии мардуми Озарбойҷон — Ҳайдар Алиев ва ёдгории Низомии Ганҷавиро тамошо намуда, бо осорхона ва дарвозаи Қалъаи Ганҷа шинос шуданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон