Дар Шаҳринав Мусобиқаи кушоди минтақавӣ оид ба гӯштини ҷудо доир гардид

ШАҲРИНАВ, 13.09.2025 /АМИТ «Ховар»/. 11 сентябр бахшида ба 34-солагии Истиқлолияти давлатии Ҷумҳурии Тоҷикистон бо ташаббуси бахши кор бо ҷавонон ва варзиши ноҳияи Шаҳринав дар Муассисаи давлатии мактаби варзишии №2 Мусобиқаи кушоди минтақавӣ оид ба намуди гӯштини ҷудо байни ҷавонони солҳои таваллуди 2005-2007 баргузор шуд. Дар ин хусус ба хабарнигори  минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии ноҳияи Шаҳринав иттилоъ доданд.

Тибқи иттилои директори Мактаби варзишии №2-и ноҳия Ориф Уроқов, дар мусобиқа зиёда аз 160 нафар варзишгарон аз шаҳру ноҳияҳои Роғун, Ваҳдат, Ҳисор, Турсунзода Файзобод, Рӯдакӣ, Варзоб ва Шаҳринав иштирок намуда, байни ҳам қувва озмуданд.

Мақсад аз ташкил намудани мусобиқа тарғибу ташвиқи тарзи ҳаёти солим ва ҷалби ҷавонон ба ин намуди варзиш мебошад.

Дар анҷом 40 нафар дар вазнҳои гуногун ғолиби мусобиқа ва соҳиби ҷойҳои якум, дуюм ва сеюм  гардида, бо дипломҳои дараҷаи 1,2,3 ва туҳфаҳои хотиравӣ қадрдонӣ карда шуданд.

АКС: Мақомоти иҷроияи ҳокимияти давлатии ноҳияи Шаҳринав