Доир ба Истиқлолияти давлатӣ ва рушди саноати миллӣ конференсияи ҷумҳуриявӣ баргузор шуд

ДУШАНБЕ, 10.09.2025 /АМИТ «Ховар»/. Бахшида ба 34-солагии Истиқлолияти давлатии Ҷумҳурии Тоҷикистон дар Донишгоҳи техникии Тоҷикистон ба номи академик Муҳаммад Осимӣ  таҳти унвони «Истиқлолияти давлатӣ ва рушди саноати миллӣ: самтҳои асосӣ ва дурнамо» конференсияи ҷумҳуриявии илмӣ-амалӣ баргузор гардид, хабар доданд ба АМИТ «Ховар» аз ин донишгоҳ.

Дар конференсия иштирокдорон оид ба паҳлуҳои гуногуни таърихӣ, сиёсӣ ва иқтисодии истиқлол ва нақши он дар рушди саноати миллӣ сухан намуданд.

Масъалаҳои муҳим, аз ҷумла афзалияти соҳа, зарурати ҷалби сармоя, истифодаи самараноки захираҳои дохилӣ, воридсозии технологияҳои муосир ва таъмини рақобатпазирии маҳсулоти ватанӣ мавриди таҳлил қарор дода шуданд. Ҳамзамон роҳҳои густариши ҳамкорӣ байни бахши давлатӣ ва хусусӣ, тавсеаи истеҳсолот ва содироти маҳсулоти саноатӣ ҳамчун самтҳои асосии дурнамои рушд таъкид гардиданд.

Иброз гардид, ки дар солҳои соҳибистиқлолӣ Тоҷикистон дар соҳаи саноат ва илму маориф ба дастовардҳои назаррас ноил гардида, заминаҳои устувор барои рушди минбаъдаи мамлакат гузошта шуданд.

Дар конференсия донишмандону устодон ва муҳаққиқон доир ба паҳлуҳои гуногуни мавзуъ маърузаи илмӣ пешниҳод намуданд.

АКС: Донишгоҳи техникии Тоҷикистон ба номи академик Муҳаммад Осимӣ