«ИЛМ-ФУРӮҒИ МАЪРИФАТ». Озмуни ҷумҳуриявӣ дар Суғд бо иштироки зиёда аз 1400 довталаб оғоз ёфт

ДУШАНБЕ, 15.09.2025. /АМИТ «Ховар»/. Дар вилояти Суғд даври вилоятии Озмуни ҷумҳуриявии «Илм — фурӯғи маърифат» бо иштироки зиёда аз 1400 довталаб оғоз гардид. Дар ин хусус ба АМИТ «Ховар» аз Раёсати маорифи вилояти Суғд хабар доданд.

Иброз гардид, ки озмуни «Илм – фурӯғи маърифат» иқдоми арзишманди давлату ҳукумат дар самти ҷалби ҷомеа, махсусан ҷавонон ба омӯзиши илм аст. Ин озмун на танҳо майдони рақобати солим байни хонандагону донишҷӯён ва аҳли илму фарҳанг мебошад, балки саҳнаи ифодаи неруи фикрии насли навин низ ба ҳисоб меравад.

Баргузории чунин озмунҳо барои рушди қобилияту истеъдоди хонандагону донишҷӯён имконияти фарох фароҳам оварда, онҳоро ба мутолиаи бештар, таҳқиқоти илмӣ ва ҷустуҷӯҳои эҷодкорона ҳидоят месозад.

Дар раванди баргузории даври вилоятӣ ҳакамон ва коршиносони соҳавӣ ба дониши довталабон бо меъёрҳои дақиқ баҳо мегузоранд. Беҳтарин иштирокчиён имкон пайдо мекунанд, ки вилоятро дар даври ниҳоӣ – сатҳи ҷумҳуриявӣ муаррифӣ намоянд.

Бо итминон метавон гуфт, ки баргузории Озмуни ҷумҳуриявии «Илм-фурӯғи маърифат» дар вилояти Суғд муҳити илмпарвариро боз ҳам тақвият бахшида, ҷавонону наврасонро ба омӯзишу таҳқиқ, ҷустуҷӯ ва навовариҳои илмӣ бештар ҳидоят менамоянд.

АКС: Раёсати маорифи вилояти Суғд