Истиқлолияти давлатӣ ва нақши он дар эҳё ва рушди фарҳанги миллӣ дар Тоҷикистон

Сентябрь 8, 2025 10:00

ДУШАНБЕ, 08.09.2025. /АМИТ «Ховар»/. Таҳлилҳо нишон медиҳанд, ки маънои аслии Истиқлолияти давлатӣ дар соҳибихтиёрӣ ва мустақилияти комил ифода меёбад. Он имконият фароҳам меорад, ки давлат сиёсати дохилӣ ва хориҷиро мустақилона пеш барад ва самтҳои иҷтимоӣ, иқтисодӣ, маънавӣ ва фарҳангиро озодона рушд диҳад.

Маълум аст, ки Ҷумҳурии Тоҷикистон соли 1991 истиқлолияти комили давлатиро ба даст оварда, Эъломияи соҳибихтиёриро қабул намуд. Ҳамон сол кишвар ба ҳайси узви комилҳуқуқи Иттиҳоди Давлатҳои Мустақил пазируфта шуд.

Эъломияи соҳибихтиёрӣ заминаҳои ҳуқуқии истиқлолияти давлатӣ ва рушди минбаъдаро фароҳам овард. Тоҷикистон тавонист сиёсати давлатӣ ва фарҳангии худро бо такя ба анъанаҳои миллӣ ва хусусиятҳои ҷомеа роҳандозӣ намояд.

Бо ба даст овардани Истиқлолияти давлатӣ ва фазои суботу амният, мардуми Тоҷикистон ба арзишҳои миллӣ рӯ оварда, барои ҳифз, рушд ва эҳёи фарҳанги ғании таърихӣ талошҳои зиёд анҷом медиҳанд. Суханрониҳои Президенти Ҷумҳурии Тоҷикистон, Пешвои миллат  муҳтарам Эмомалӣ Раҳмон дар мулоқот бо аҳли зиё ва фарҳанг аз рӯзҳои аввали истиқлолият ба рушди фарҳанги миллӣ такони ҷиддии созанда бахшида, ба эҳё ва густариши арзишҳои миллӣ мусоидат намуданд.

Дар даврони соҳибистиқлолӣ фарҳанги миллӣ имкони рушду густариши васеъ пайдо кард. Дар заминаи анъанаҳо ва эҷодиёти мардумӣ фарҳанги умумимиллии халқи тоҷик ташаккул ёфта, мақоми аҳли фарҳанг боло рафт. Ҳукумати Ҷумҳурии Тоҷикистон қонунҳо ва барномаҳои муҳими соҳавӣ, аз ҷумла Қонуни Ҷумҳурии Тоҷикистон «Дар бораи фарҳанг»-ро (1997) қабул намуд, ки заминаи ҳуқуқӣ ва шароити мусоиди рушди фарҳангро таъмин кард.

Ба шарофати сулҳу ваҳдати миллӣ фазои мусоиди меъёрӣ-ҳуқуқӣ барои фаъолияти пурсамари муассисаҳои фарҳангӣ – фароғатии кишвар фароҳам оварда шуд. Дар ин замина, Ҳукумати Ҷумҳурии Тоҷикистон як силсила қонунҳо ва барномаҳои давлатӣ қабул намуд, ки ҳадафи асосии онҳо таҳкими фарҳанги миллӣ ва густариши арзишҳои миллӣ мебошад.

Ҳоло дар саросари ҷумҳурӣ ҳазорҳо муассисаҳои фарҳангӣ фаъолият мекунанд. Беш аз 3000 ёдгории таърихию фарҳангӣ (76% ёдгориҳои бостонӣ, 24% ёдгориҳои меъморӣ ва боқимонда ёдгориҳои меъмориву монументалӣ) ҳифз мешавад ва як қатори онҳо бо талошҳои Пешвои миллат ҳамчун иншооти таърихӣ–фарҳангӣ ба Феҳристи мероси умумиҷаҳонии ЮНЕСКО ворид гардидаанд.

Бо ташаббуси Пешвои миллат муҳтарам Эмомалӣ Раҳмон ҷашнҳои бузурги миллӣ ва фарҳангӣ дар сатҳи байналмилалӣ баргузор шуданд. Аз ҷумла, таҷлили 2500-солагии Истаравшан (2002), 2700-солагии Кӯлоб (2006), 1150-солагии Абӯабдуллоҳи Рӯдакӣ (2008), 1310-солагии Имоми Аъзам (2009), 3000-солагии Ҳисор (2015) ва ба расмият шинохтани Наврӯз ҳамчун ҷашни байналмилалӣ аз ҷумлаи ин иқдомҳо мебошанд, ки Тоҷикистонро ҳамчун вориси тамаддуни куҳан муаррифӣ намуданд.

Ҳамаи ин далелҳо гувоҳи онанд, ки Пешвои миллат муҳтарам Эмомалӣ Раҳмон шахсияти фарҳангофар ва пуштибони асосии ҳифзу рушди арзишҳои миллӣ мебошанд.

Тавре Сарвари давлат таъкид менамоянд: «Фарҳанг ҷавҳари ҳастии миллат буда, ҳамеша пайвандгари наслҳо буд ва боқӣ хоҳад монд».

Маҳз фарҳанг нақши калидиро дар солимгардонии ҳаёти маънавии ҷомеа, таҳкими пояҳои худшиносии миллӣ ва ҳифзи ҳувияти фарҳангӣ мебозад.

Истиқлолият ва ваҳдати миллӣ шароити мусоид фароҳам оварданд, ки фарҳанги миллӣ рушд ёбад, худшиносӣ таҳким гардад ва Тоҷикистон ҳамчун кишвари сулҳофар ва муттаҳидсозандаи миллат дар ҷаҳон муаррифӣ шавад.

Абдусаттор РАҲМОНЗОДА,
Мудири кафедраи технология
ҳои иҷтимоӣфарҳангӣ ва сайёҳии
Донишкадаи давлатии фар
ҳанг ва санъати Тоҷикистон
ба номи Мирзо Турсунзода,
номзади илм
ҳои педагогӣ, дотсент

Сентябрь 8, 2025 10:00

Хабарҳои дигари ин бахш

Имрӯз маҷлиси Ҳукумати Ҷумҳурии Тоҷикистон баргузор гардид
Мумфаршкунии роҳи мошингарди Зафаробод-Ҳамид Алиев-Гулистон-Дӯстӣ оғоз гардид
Дар Мактаб-интернати ҷумҳуриявии кӯдакони ятим дар ноҳияи Шаҳринав бинои хобгоҳи замонавӣ ба истифода дода шуд
Дар ноҳияи Айнӣ 8 синфхонаи иловагӣ ба истифода дода шуд
Китоби «Сиёсатшиносӣ» — фарогири сиёсати хориҷӣ ва муносибатҳои байналмилалии Тоҷикистон ба нашр расид
35-СОЛАГИИ ИСТИҚЛОЛИ ДАВЛАТӢ. Дар шаҳри Левакант коргоҳи истеҳсоли хишт ба истифода дода мешавад
Дар шаҳри Ваҳдат шуъбаи Бозрасии давлатии автомобилӣ ба истифода дода шуд
Роҳи Ҳисор-шаҳраки Айнӣ пурра мумфарш гардида, мавриди истифода қарор гирифт
Пешвои миллат Эмомалӣ Раҳмон дар шаҳри Ваҳдат бо нашъунамои дарахтони хоҷагии ниҳолпарварӣ, намоиши маҳсулоти кишоварзӣ ва рафти кишти такрорӣ шинос шуданд
Президенти Ҷумҳурии Тоҷикистон Эмомалӣ Раҳмон дар шаҳри Ваҳдат корхонаи «Роял Бебӣ Тоҷикистон»-ро ба таври фосилавӣ ифтитоҳ намуданд
Сарвари давлат Эмомалӣ Раҳмон дар шаҳри Ваҳдат ба фаъолияти ҶДММ «Зиннат Гач» оғоз бахшиданд
Пешвои миллат Эмомалӣ Раҳмон дар шаҳри Ваҳдат корхонаи истеҳсоли хишти Ҷамъияти дорои масъулияти маҳдуди «Талант»-ро ба истифода доданд