Қоҳир Расулзода дар ноҳияи Носири Хусрав бо корҳои сохтмонӣ шинос шуд

ДУШАНБЕ, 01.09.2025. /АМИТ «Ховар»/. Дар ноҳияи Носири Хусрав бо иштироки Сарвазири Тоҷикистон Қоҳир Расулзода бинои маъмурӣ (иловагӣ) дар назди мақомоти иҷроияи ҳокимияти давлатӣ мавриди истифода қарор дода шуд. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Бинои маъмурӣ (иловагӣ) дар назди Мақомоти иҷроияи ҳокимияти давлатии ноҳияи Носири Хусрав аз 10 утоқи корӣ иборат мебошад.

Қоҳир Расулзода зимни вохӯрӣ хизматчиёни давлатӣ онҳоро вазифадор намуд, ки ба Ватану миллат содиқона хизмат намоянд.

Сарвазири Тоҷикистон дар деҳаи Лаби Ҳавзи Ҷамоати деҳоти Тахти Хусрави ноҳияи Носири Хусрав бо сохтмони пойгоҳи обкашии МУЗ – Бешкент низ шинос шуд.

Пойгоҳи обкашии мелиоративии Бешкент соли 1982 ба истифода дода шуда, тавассути пойгоҳ, ки аз 5 дастгоҳи обкашӣ иборат буда, ҳамагӣ 1 адади он коршоям мебошад, барои паст намудани сатҳи обҳои зеризаминии 6424 гектар заминҳои кишоварзии ноҳияи Носири Хусрав хизмат мерасонад.

Бо маблағгузории Маркази татбиқи лоиҳаи «Обёрии заминҳои водии Данғара» барои таъмиру барқарорсозии пойгоҳи мелиоративии (Муз) Бешкент дар ноҳияи Носири Хусрав ба тариқи тендер озмун гузаронида шуд. Аз ҷониби Ҷамъияти дорои масъулияти маҳдуди «Умед-1»  бинои пойгоҳ аз таъмири ҷорӣ бароварда шуда, пойгоҳи мавҷуда таъмир ва берун аз бинои пойгоҳ васлу насб карда шуд. Се пойгоҳи обкашӣ бо ҳамаи таҷҳизот аз хориҷи мамлакат ворид карда шуд, ки рӯзҳои наздик васл карда мешаванд. ​​

Сарвазири Тоҷикистон Қоҳир Расулзода барои таъмини фаъолияти пайвастаи ин пойгоҳҳо ва сари вақт бо оби полезӣ таъмин намудани заминҳои кишоварзӣ ба масъулин супоришҳои мушаххас дод.

АКС: Хадамоти матбуоти Раиси вилояти Хатлон