Тоҷикистон ва ИМА ҳамкориро дар самти тиҷораткунонии ихтироот тақвият мебахшанд

ДУШАНБЕ, 20.09.2025. /АМИТ «Ховар»/. 19 сентябр директори Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон Мирзо Исмоилзода бо намояндагони Барномаи рушди ҳуқуқии тиҷоратии Вазорати савдои Иёлоти Муттаҳидаи Америка (CLDP) таҳти раёсати сарҳуқуқшиноси (CLDP) Джеймс Филпи вохӯрӣ намуд. Дар ин хусус ба АМИТ «Ховар» аз Муассисаи давлатии «Маркази миллии патенту иттилоот» хабар доданд.

Дар ҷараёни вохӯрӣ ҷонибҳо масъалаҳои дуҷониба дар самти тиҷораткунонии ихтироот, интиқоли технологияҳо ва бозомӯзии мутухассисонро баррасӣ намуданд.

Зимни вохӯрӣ таъкид гардид, ки таҳкими ҳамкорӣ  дар соҳаи моликияти зеҳнӣ, омӯзиши таҷрибаи байналмилалӣ ва баланд бардоштани сатҳи тахассусии кормандон аз омилҳои муҳим дар рушди низоми инноватсионӣ дар Ҷумҳурии Тоҷикистон ба ҳисоб меравад.

Тарафайн аз натиҷаҳои вохӯрӣ изҳори қаноатмандӣ намуда, омодагии худро барои тавсеаи минбаъдаи ҳамкории судманд дар доираи барномаи (CLDP) изҳор доштанд.

АКС: Муассисаи давлатии «Маркази миллии патенту иттилоот»-и Вазорати рушди иқтисод ва савдои Ҷумҳурии Тоҷикистон