Вазорати маориф ва илм дар самти омодасозии тренерони сатҳи миллӣ дар системаи EMIS омӯзиш доир намуд

ДУШАНБЕ, 28.09.2025 /АМИТ «Ховар»/. Бо ташаббуси Вазорати маориф ва илми Ҷумҳурии Тоҷикистон аз ҷониби Муассисаи давлатии «Маркази ҷумҳуриявии таҳлил, иттилоот ва технологияҳои рақамӣ» барои омода намудани тренерони сатҳи миллӣ дар самти татбиқи Системаи иттилооти идоракунии соҳаи маориф ва илм (EMIS) омӯзишҳо ба роҳ монда шуданд. Дар ин хусус ба АМИТ «Ховар» аз маркази матбуоти Вазорати маориф ва илм хабар доданд.

Ин навбат омӯзишҳо барои мутахассисони шаҳру ноҳияҳои тобеи ҷумҳурӣ буда, ҳадафи асосии он таъмин намудани татбиқи пурраи Системаи иттилооти идоракунии соҳаи маориф ва илм (EMIS) мебошад. Зимни машғулият иштирокчиён истифодаи имконияти пешрафтаи система, таҳияи ҳисоботи мукаммал, идоракунии равандҳои дохилимуассисавӣ ва таҳлили маълумоти омориро азхуд намуданд.

Ба иттилои манбаъ, минбаъд ин мутахассисон ҳамчун тренерони сатҳи миллӣ барои пурра омӯзонидани маъмурони муассисаҳои таълимӣ раовна карда мешаванд, то ҷараёни татбиқи EMIS дар тамоми сатҳҳо самаранок ба роҳ монда шавад.

Ин омӯзиш қадами муҳим дар рушди иқтидори кадрӣ ва тақвияти заминаҳои устувори рақамисозии низоми маорифи ҷумҳурӣ арзёбӣ мегардад.

АКС: Вазорати маориф ва илми Ҷумҳурии Тоҷикистон