Дар ноҳияи Мастчоҳ нақшаи ҷамъоварии пахта қариб 80 фоиз иҷро гардидааст

ДУШАНБЕ, 24.10.2025 /АМИТ «Ховар»/. Соли равон кишоварзони ноҳияи Мастчоҳ дар 10 ҳазору 128 гектар пунбадона кишт намуданд ва ният доранд, ки аз он беш аз 30 ҳазор тонна пахта истеҳсол намоянд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Мастчоҳ хабар медиҳад, нақшаи истеҳсоли пахта барои соли равон 27 ҳазору 391 тонна муайян гардидааст. То 23 октябр дар ноҳия 21 ҳазору 873,4 тонна пахта ҷамъоварӣ карда шудааст, ки 79,9 фоизи нақшаро ташкил медиҳад.

Ҳамарӯза беш аз 14 ҳазор саҳмдорону ҳашарчиён дар саҳро ба ҷамъоварии ҳосил машғул мебошанд.

Бояд гуфт, ки пахта ашёи муҳими соҳаи саноат ба ҳисоб рафта, ҷамъоварии он ба рушди иқтисодию иҷтимоии ноҳия таъсири мусбат мерасонад.

АКС: Мақомоти иҷроияи ҳокимияти давлатии ноҳияи Мастчоҳ