Доир ба омодагӣ ба нишасти сарони давлатҳои ИДМ ҷаласа баргузор гардид

ДУШАНБЕ, 08.10.2025. /АМИТ «Ховар»/. Имрӯз дар шаҳри Душанбе зери раёсати Ҷумҳурии Тоҷикистон ҷаласаи мувофиқасозӣ баргузор гардид, ки дар он масъалаҳои марбут ба омодагӣ ба нишасти дарпешистодаи сарони кишварҳои Иттиҳоди Давлатҳои Мустақил ва ҷаласаи Шурои вазирони корҳои хориҷии кишварҳои аъзои Иттиҳод баррасӣ карда шуданд, иттилоъ медиҳад АМИТ «Ховар».

Намояндагони баландпояи кишварҳои аъзои Иттиҳоди Давлатҳои Мустақил асноди ниҳоии нишасти дарпешистода дар сатҳи олӣ ва вазиронро баррасӣ ва мувофиқа намуданд.

Иштирокдорон ҳамчунин вобаста ба ҷанбаҳои тадорукотию протоколии ҷаласаи Шурои сарони кишварҳо ва ҷаласаи Шурои вазирони корҳои хориҷии Иттиҳоди Давлатҳои Мустақил табодули афкор намуданд.

Ёдовар мешавем, ки 9-10 октябр дар шаҳри Душанбе ду ҳамоиши бузурги байналмилалӣ — Саммити «Осиёи Марказӣ — Русия» ва ҷаласаи Шурои сарони давлатҳои Иттиҳоди Давлатҳои Мустақил баргузор мегарданд.

АКС: АМИТ «Ховар»