ИНФРАСОХТОРИ «САБЗ» ВА ЭНЕРГИЯИ «ТОЗА». Дар доираи Форуми байналмилалии сармоягузории «Душанбе Инвест-2025» чорабинии канорӣ доир шуд
ДУШАНБЕ, 14.10.2025 /АМИТ «Ховар»/. «Инфрасохтори сабз ва энергияи тоза» — таҳти чунин унвон имрӯз дар ҳошияи Форуми байналмилалии сармоягузории «Душанбе Инвест-2025» чорабинии канорӣ баргузор гардид, иттилоъ медиҳад хабарнигори АМИТ «Ховар».
Дар кори он Вазири энергетика ва захираҳои оби Ҷумҳурии Тоҷикистон Далер Ҷумъа иштирок ва сухан намуд. Дар чорабинии канорӣ намояндагони шарикони рушд, сармоягузорон ва коршиносон иштирок намуданд.
Вазири энергетика ва захираҳои оби Ҷумҳурии Тоҷикистон иброз дошт, ки Тоҷикистон бо назардошти иқтидори гидроэнергетикии худ, ки дар як сол 527 миллиард кВт-соат неруи барқи аз лиҳози экологӣ тоза ва аз назари иқтисодӣ арзонро ташкил медиҳад, ба масоили таъмини истиқлоли энергетикӣ ва рушди ин соҳа аҳамияти хос медиҳад.
«Неругоҳи барқи обии «Роғун» яке аз бузургтарин иншооти гидроэнергетикӣ дар минтақа буда, то имрӯз дар таъмини неруи барқ саҳми назаррас дорад. Ду агрегати ба истифода додаи он то ҳол қариб 10 миллиард киловатт-соат неруи барқ истеҳсол намудааст. Баъди пурра ба итмом расидани сохтмони Неругоҳи барқи обии «Роғун» бо иқтидори умумии 3780 МВт дар баробари таъмини амнияти энергетикии Ҷумҳурии Тоҷикистон он инчунин дар таъмини кишварҳои минтақаи Осиёи Марказӣ ва Осиёи Ҷанубӣ (Афғонистон ва Покистон) бо энергияи аз ҷиҳати экологӣ тоза нақши муҳим мегузорад», — иброз намуд Далер Ҷумъа.
Дар Тоҷикистон дар як сол то 300 рӯзи офтобӣ аст. Тибқи ҳисобҳои пешакӣ, иқтидори энергетикии Тоҷикистон танҳо дар қисмати шимолӣ аз ҳисоби энергияи Офтоб зиёда аз 4 600 МВт ва энергияи бод 580 МВт арзёбӣ гардида, ба ҳолати имрӯза ин иқтидор ҳанӯз истифода нашудааст.
Дар чорабинии канорӣ мавзуъҳои бозори энергетикӣ дар Тоҷикистон ва раванди ташаккули он, ҷалби бахши хусусӣ ба соҳаи энергетика бо таваҷҷуҳ ба манбаъҳои барқароршавандаи энергия, аз қабили гидроэнергетика, Офтоб ва бод, ба роҳ мондани ҳамкорӣ бо усулҳои шарикии давлат ва бахши хусусӣ мавриди баррасӣ қарор гирифтанд.
Марзия САИДЗОДА,
АМИТ «Ховар»
АКС: АМИТ «Ховар»
Ҷашни байналмилалии Наврӯз дар Бонки миллии Тоҷикистон дар сатҳи баланд таҷлил гардид
Дар Душанбе истифода ва ҳифзи захираҳои обии мамлакат дар шароити тағйирёбии иқлим баррасӣ гардид
Ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт баргузор шуд
Бонки миллии Тоҷикистон ба Эъломияи Кейптаун ҳамроҳ шуд
35-СОЛАГИИ ИСТИҚЛОЛИ ДАВЛАТӢ. Дар ноҳияи Восеъ сохтмони иншооти таъйиноти гуногун идома дорад
Дар Душанбе натиҷаҳои COP30 ва раванди такмилсозии NDC 3.0-и Тоҷикистон баррасӣ гардид
«ТОП – 35 ШАРИКИ БОЭЪТИМОДИ СОЛ». Ба муносибати 35-солагии Истиқлолияти давлатӣ озмун баргузор мегардад
Дар ноҳияи Деваштич Маркази ҷумҳуриявии инноватсия ва технологияҳо дар соҳаи картошкапарварӣ таъсис дода мешавад
Бахшида ба Рӯзи байналмилалии ҳимояи ҳуқуқи истеъмолкунандагон корҳои фаҳмондадиҳӣ доир гардид
ИМРӮЗ-РӮЗИ БАЙНАЛМИЛАЛИИ ҲИМОЯИ ҲУҚУҚИ ИСТЕЪМОЛКУНАНДАГОН. Зиёда аз 86 тонна маҳсулоти бесифати бозорҳои истеъмолӣ нобуд карда шуд
Байни ширкати ҳавопаймоии хусусии «Shohin Airlines» ва Бунёди сармоягузории аврупоӣ Созишномаи сармоягузорӣ ба имзо расид
Ҷаласаи Гурӯҳи кории байниидоравӣ оид ба мониторинг ва арзёбии ҳуҷҷатҳои банақшагирии стратегӣ доир гардид
