Сафири Тоҷикистон дар Конгресси ҷаҳонӣ оид ба ҳифзи табиат дар Абу Забӣ иштирок намуд

ДУШАНБЕ, 11.10.2025 /АМИТ «Ховар»/. 9 октябр Сафири Фавқулода ва Мухтори Ҷумҳурии Тоҷикистон дар Амороти Муттаҳидаи Араб Ашрафҷон Гулов дар Конгресси ҷаҳонӣ оид ба ҳифзи табиат, ки аз ҷониби Иттиҳодияи байналмилалӣ оид ба ҳифзи табиат (IUCN) дар ҳамбастагӣ бо Вазорати тағйирёбии иқлим ва ҳифзи муҳити зисти Амороти Муттаҳидаи Араб дар шаҳри Абу Забӣ баргузор гардид, иштирок намуд.

Тавре ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Араб хабар доданд, Конгресс нахустин маротиба  дар қаламрави кишварҳои Шурои ҳамкории давлатҳои арабии Халиҷ доир гардида, аз 9 то 15 октябри соли 2025 идома меёбад.

Дар конгрес  беш аз 10 ҳазор иштирокчӣ — роҳбарони давлату ҳукуматҳо, сарвазирон, вазирон, намояндагони ниҳодҳои давлатӣ, ҳайатҳои дипломатии муқим, ташкилотҳои минтақавию байналмилалӣ, ҷомеаи шаҳрвандӣ, доираҳои илмӣ ва соҳибкориву тиҷоратӣ дар шакли ҳузурӣ ва маҷозӣ иштирок  доранд.

Ҳадафи асосии ин ҳамоиши бузург — муайянсозии самтҳои афзалиятноки фаъолияти ҷомеаи байналмилалӣ дар соҳаи ҳифзи табиат, ҳалли мушкилоти тағйирёбии иқлим ва тақвияти ҳамкорӣ  барои таъмини рушди устувор дар даҳсолаҳои оянда мебошад.

АКС: Сафорати Ҷумҳурии Тоҷикистон дар Амороти Муттаҳидаи Араб