«САЙРИ МЕҲРГОН». Дар доираи ин хатсайр меҳмонони хориҷӣ бо таъриху суннатҳои ин ҷашни бостонӣ шинос шуданд

ДУШАНБЕ, 19.10.2025. /АМИТ «Ховар»/. 19 октябр дар доираи хатсайри сайёҳии «Сайри Меҳргон», ки бо ташаббуси Мақомоти иҷроияи ҳокимияти давлатии шаҳри Душанбе бо мақсади рушди соҳаи сайёҳӣ, муаррифии бренди миллӣ ва тарғиби арзишҳои фарҳангӣ ташкил гардид, иштирокчиён дар фазои идона бо таъриху суннатҳои ҷашни Меҳргон, ҳунарҳои мардумӣ, таомҳои гуногуни миллӣ ва меҳмондории тоҷикона аз наздик шинос шуданд. Дар ин хусус ба АМИТ «Ховар» аз шуъбаи рушди сайёҳии Мақомоти иҷроияи ҳокимияти давлатии шаҳри Душанбе хабар доданд.

Хатсайри сайёҳии «Сайри Меҳргон» бо ҷалби намояндагони корпуси дипломатӣ, донишҷӯёни хориҷии муассисаҳои таҳсилоти олии ҳудуди шаҳри Душанбе, меҳмонони пойтахт, сайёҳони хориҷии ширкатҳои сайёҳӣ, инчунин намояндагони воситаҳои ахбори омма баргузор гардид.

Дар доираи хатсайр роҳбаладон бо забонҳои тоҷикӣ, русӣ ва англисӣ ба иштирокчиён доир ба имконияти сайёҳии шаҳри Душанбе ва моҳияти Ҷашни Меҳргон маълумоти муфассал пешниҳод карданд.

Иштирокчиён бо таъриху анъанаҳои таҷлили Ҷашни Меҳргон, рамзҳои фарҳангӣ ва мардумии он, дастовардҳои кишоварзон, ҳунарҳои дастии миллӣ, мусиқию рақсу сурудҳои суннатӣ, инчунин бо фарҳанги меҳмондории тоҷикон шинос шуданд. Онҳо ҳамзамон бо ҷараёни омодасозии таомҳои миллӣ, аз ҷумла оши палов, шинос гардида, дар баъзе озмуну намоишҳои ҷолиб иштирок намуданд.

Дар доираи таҷлили Ҷашни Меҳргон «Фестивал-намоиши маҳсулот ва техникаи кишоварзӣ», «Фестивали занбӯрпарварон, намоиш ва фурӯши асал», «Иди тарбузу харбуза ва каду», «Иди себ ва ангур», «Фестивали оши палов», инчунин «Намоиш ва фурӯши шолӣ ва биринҷ» баргузор гардид.

Фазои ҷашнӣ бо мусиқию сурудҳои миллӣ ва намоиши ҳунарҳои мардумӣ рангу ҷило гирифт ва муҳити идонаи Меҳргонро боз ҳам зеботар намуд.

Ба иштирокчиёни хатсайр обҳои нушокӣ, шириниҳо ва хӯрокҳои миллӣ пешкаш гардиданд. Ҳамчунин барои онҳо имкони гирифтани аксҳои хотиравӣ дар заминаи гӯшаҳои рангоранги ҷашн ва бо рамзҳои Меҳргон фароҳам оварда шуд.

Бояд гуфт, ки ҳадаф аз ташкили хатсайри сайёҳӣ рушди соҳаи сайёҳӣ, ташаккул ва муаррифии бренди миллии сайёҳӣ, маркетинг ва пешбурди маҳсулоти соҳаи сайёҳӣ, ҳифз, инкишоф ва истифодаи захираҳои таърихию фарҳангӣ дар доираи таҷлили Ҷашни Меҳргон арзёбӣ гардид.

Лозим ба ёдоварист, ки ҷашнҳои миллӣ, бахусус Наврӯз, Сада, Тиргон ва Меҳргон метавонанд барои муаррифии таъриху фарҳанг, урфу одат, имкониятҳои сайёҳии кишвар ва ҷалби бештари сайёҳони хориҷӣ ҳамчун бренди миллии сайёҳӣ хизмат намоянд.

АКС: шуъбаи рушди сайёҳии Мақомоти иҷроияи ҳокимияти давлатии шаҳри Душанбе