Татбиқи лоиҳаҳои муштарак дар самтҳои афзалиятноки Тоҷикистон бо Корпоратсияи байналмилалии молиявӣ баррасӣ шуд

ДУШАНБЕ, 16.10.2025 /АМИТ «Ховар»/. Ҳолати кунунӣ ва дурнамои ҳамкории Ҷумҳурии Тоҷикистон бо Корпоратсияи байналмилалии молиявӣ (IFC) зимни мулоқоти ҳайати Ҷумҳурии Тоҷикистон таҳти роҳбарии Вазири молияи Ҷумҳурии Тоҷикистон Файзиддин Қаҳҳорзода бо Ноиби Президенти минтақавии Корпоратсияи байналмилалии молиявӣ (IFC), масъули Осиёи Марказӣ ва Ховари Миёна Рикардо Пулити баррасӣ гардид.

Тавре АМИТ «Ховар» бо истинод ба Вазорати молия хабар медиҳад, мулоқот дар ҳошияи ҷаласаҳои солонаи Бонки ҷаҳонӣ ва Хазинаи байналмилалии асъор дар шаҳри Вашингтони Иёлоти Муттаҳидаи Амрико баргузор шуда, ҷонибҳо аҳамияти фаъолгардонии бештари фаъолияти корпоратсияро дар ҷумҳурӣ таъкид намуданд. Аз ҷумла, таваҷҷуҳи хосса ба зарурати тавсеаи барномаҳои дастгирии молиявӣ, аз ҷумла тавассути татбиқи васеи лизинг ва қарзҳои ипотекӣ ба воситаи бонкҳои маҳаллӣ зоҳир карда шуд.

Ҷониби Тоҷикистон барои ҳамкории фаъол дар самти дастгирии бахши хусусӣ, сармоягузории мустақими хориҷӣ ва рушди муҳити мусоиди сармоягузорӣ изҳори омодагӣ карда, иштироки IFC-ро дар татбиқи лоиҳаҳои стратегӣ, махсусан дар бахши энергетика ва истифодаи манбаъҳои барқароршавандаи энергия муҳим арзёбӣ намуд.

Ҳамзамон ҳамсуҳбатон нақшаҳои мушаххасро барои таҳия ва татбиқи лоиҳаҳои муштарак дар самтҳои афзалиятноки Тоҷикистон, бахусус рушди бахши хусусӣ, истеҳсоли энергияи барқароршаванда, аз ҷумла офтобӣ, густариши иқтисоди «сабз» ва ғайра барои солҳои наздик баррасӣ намуданд.

Дар фарҷом ҷонибҳо барои таҳкими минбаъдаи ҳамкорӣ бо назардошти афзалияти стратегии Тоҷикистон изҳори омодагӣ  намуда, барои татбиқи лоиҳаҳои нав ва ҷалби маблағгузории иловагӣ ба мувофиқа расиданд.

АКС: Вазорати молияи Ҷумҳурии Тоҷикистон