Дар Душанбе масъалаҳои марбут ба тавоноӣ барои мувозинати низоми энергетикӣ баррасӣ карда шуд

ДУШАНБЕ, 15.11.2025 /АМИТ «Ховар»/. Масъалаҳои марбут ба тавоноӣ барои мувозинати низоми энергетикӣ зимни ҳамоише, ки дар шаҳри Душанбе бо ибтикори Вазорати энергетика ва захираҳои оби Ҷумҳурии Тоҷикистон баргузор гардид, баррасӣ карда шуданд.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки дар ҳамоиш роҳбарияти вазорат, мутахассисону коршиносони миллӣ ва байналмилалӣ, инчунин шарикони рушд иштирок намуданд.

Ҳадафи асосии ҳамоиш аз мубодилаи таҷриба ва муҳокимаи роҳҳои беҳсозии идоракунии мувозинати системаҳои энергетикӣ дар шароити рушди босуръати иқтисоди миллӣ ва афзоиши талабот ба неруи барқ иборат буд.

Дар ҷараёни ҳамоиш масъалаҳои боло бурдани устувории шабакаҳои энергетикӣ, тақвияти иқтидори техникӣ ва истифодаи технологияҳои муосир барои тавозуни таъминот ва истеъмол баррасӣ гардиданд.

АКС: Вазорати энергетика ва захираҳои оби Ҷумҳурии Тоҷикистон