Дар Душанбе татбиқи лоиҳаҳои муҳими стратегӣ дар соҳаи нақлиёт байни Тоҷикистон ва Чин баррасӣ гардид

ДУШАНБЕ, 27.12.2025 /АМИТ «Ховар»/. Рушди ҳамкорӣ дар соҳаи нақлиёт ва татбиқи лоиҳаҳои муҳими стратегӣ байни Тоҷикистон ва Чин дар меҳвари мулоқоти Вазири нақлиёти Тоҷикистон Азим Иброҳим бо мушовири масоили тиҷоративу иқтисодии Сафорати Ҷумҳурии Мардумии Чин дар Ҷумҳурии Тоҷикистон Сун Хэ қарор гирифт, иттилоъ медиҳад АМИТ «Ховар» бо истинод ба Вазорати нақлиёти Тоҷикистон.

Азим Иброҳим ба ҷониби Чин барои татбиқи лоиҳаҳо дар соҳаи роҳу нақлиёт ва рушди инфрасохтори нақлиётии кишвар изҳори сипос намуда, гуфт, ки Чин яке аз шарикони муҳими Тоҷикистон дар ин самт мебошад.

Мушовири Сафорати Чин Сун Хэ иттилоъ дод, ки лоиҳаҳои сохтмони роҳи мошингарди «Мурғоб – Кулма», бунёди роҳҳои дуқабата -эстакада дар буриши кӯчаҳои «Абай – А.Қаҳҳоров», буриши кӯчаҳои «А. Ҷомӣ – А. Қаҳҳоров», буриши кӯчаҳои «Ҷанубӣ – А. Қаҳҳоров» ва сохтмони пул дар болои дарёи Душанбе дар буриши кӯчаҳои «Ҷанубӣ – А. Қаҳҳоров» дар шаҳри Душанбе аз марҳилаи мувофиқаи дохилисоҳавӣ дар Чин гузаштаанд.

Айни замон ҳамкории байни мутахассисони ҳарду ҷониб оид ба таҳия ва пешниҳоди маълумоти техникӣ ва дигар маводи зарурии соҳавӣ идома доранд. Интизор меравад, ки дар аввали соли 2026 ҳайати мутахассисони чинӣ барои амалҳои минбаъдаи марбут ба ин лоиҳаҳо ба Тоҷикистон ташриф оранд.

Иттилоъ дода шуд, ки Вазорати нақлиёт ва КВД «Пажӯҳишгоҳи лоиҳакашии иншооти нақлиётӣ»-и вазорат омодаанд, ки маълумоти техникӣ ва дигар маводҳои соҳавии барои татбиқи лоиҳаҳо зарурро таҳия ва пешниҳод намоянд.

Ҳамчунин дар ҷараёни мулоқот масъалаи татбиқи лоиҳаи таҷдиди гузаргоҳи назоратии «Кулма» баррасӣ шуд. Таъкид гардид, ки лоиҳаи мазкур ҳоло дар баррасии вазорату идораҳои дахлдори Тоҷикистон қарор дорад ва дар ояндаи наздик назари ҷониби Тоҷикистон оид ба татбиқи он ба ҷониби Чин пешниҳод карда мешавад.

АКС: Вазорати нақлиёти Ҷумҳурии Тоҷикистон