Дар ноҳияи Ёвон кишти картошка идома дорад

ДУШАНБЕ, 14.12.2025 /АМИТ «Ховар»/. Кишоварзони  ноҳияи Ёвон талаботи бозори истеъмолиро ба инобат гирифта, имсол масоҳати кишти картошкаро васеъ  намуданд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон иттилоъ доданд.

Айни замон дар 1,2 гектар замини хоҷагии деҳқонии «Ҷонбош» ва  1,3 гектар замини хоҷагии деҳқонии «Салтанат»-и ҳудуди деҳоти ба номи Гулсара Юсуфова кишти картошка идома дорад.

Бояд гуфт, ки бо  дастгирӣ ва таваҷҷуҳи пайвастаи Ҳукумати мамлакат ба рушди соҳаи кишоварзӣ имконият фароҳам меорад, то хоҷагидорон  заминро самаранок истифода бурда, ҳаҷми истеҳсоли маҳсулоти асосии озуқаворӣ,  аз ҷумла картошкаро  зиёд намоянд.

Таъкид гардид, ки тағйирёбии иқлим, афзоиши талабот ба маҳсулоти ғизоӣ, рақобати бозор ва эҳсоси  масъулияти баланд  дар таъмини амнияти озуқавории мамлакат, кишоварзонро  водор месозад, ки барои мақсаднок ва оқилона истифода бурдани   замин   тадбирҳои муассир андешанд.

Роҳбарияти ноҳияи Ёвон  роҳбарони хоҷагиҳои деҳқонӣ ва  сокинонро барои заминҳои наздиҳавлигӣ   даъват намуданд, ки ҷиҳати баланд бардоштани ҳосилнокӣ, истифодаи оқилонаи обу замин, татбиқи технологияҳои муосири кишоварзӣ ва беҳтар намудани сифати маҳсулоти истеҳсолшаванда тадбирҳои зарурӣ андешанд.

АКС: Мақомоти иҷроияи ҳокимияти давлатии ноҳияи Ёвон