Дар Мурғоб неругоҳи хурди офтобӣ бо иқтидори 1300 кВт ба истифода дода шуд

ДУШАНБЕ, 27.01.2026 /АМИТ «Ховар»/. Дар Ҷамоати деҳоти Қизилработи ноҳияи баландкӯҳи Мурғоб неругоҳи хурди офтобӣ бо иқтидори 1300 кВт ва низоми захиракунии энергия бо ғунҷоиши 600 кВт-соат ба истифода дода шуд. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Ба кор даромадани ин иншооти муҳим ба беҳтар гардидани таъминоти барқ ва расонидани неруи устувор ба хонаҳои сокинони ин минтақаи дурдасти кӯҳистони Тоҷикистон мусоидат намуд.

Неругоҳи хурди офтобӣ бо истифода аз технологияҳои навини офтобӣ сохта шуда, имкон медиҳад, ки аҳолӣ новобаста аз шароити иқлим бо неруи барқи аз ҷиҳати экологӣ тоза таъмин гардад.

Татбиқи ин лоиҳа қадами муҳим дар самти рушди энергетикаи «сабз», коҳиши вобастагӣ аз манбаъҳои анъанавии энергия ва баланд бардоштани сатҳи зиндагии сокинони ноҳияҳои баландкӯҳ мебошад.

Бояд гуфт, ки дар доираи лоиҳаи «Электрификатсияи деҳот» дар 15 дeҳаи ноҳияи Мурғоб — Рангкӯл, Қаракӯл, Харгӯшӣ, Тохтамиш, Шаймоқ, Мамадзоир, Гулзор (Чечекде), Оқтал, Қизиларт, Ҷагигир, Шатпут, Башкумбез, Булункӯл ва Қизилором неругоҳҳои офтобӣ ба истифода дода шуданд.

АКС аз манбаъҳои боз