Бо мақсади рушди устувори соҳаи захираҳои об Ёддошти тафоҳуми ҳамкорӣ ба имзо расид

ДУШАНБЕ, 20.02.2026 /АМИТ «Ховар»/. Бо мақсади рушди устувори соҳаи захираҳои об байни Вазорати энергетика ва захираҳои  оби Ҷумҳурии Тоҷикистон, Кумитаи хоҷагии манзилию коммуналии назди Ҳукумати Ҷумҳурии Тоҷикистон, Маркази идораи лоиҳаи рушди инфрасохтори маҳаллӣ (коммуналӣ), Донишгоҳи техникии Тоҷикистон ба номи академик Муҳаммад Осимӣ ва Ташкилоти ҷамъиятии «Гурӯҳи ҷавонон оид ба ҳифзи муҳити атроф» Ёддошти тафоҳуми ҳамкорӣ ба имзо расид. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон итттилоъ медиҳад.

Ин санад бо мақсади рушди устувори соҳаи захираҳои об, омода намудани мутахассисони ҷавон, баланд бардоштани таваҷҷуҳи ҷавонон ба ихтисосҳои таъмин ва истифодаи об, инчунин фароҳам овардани шароит барои таҷрибаи амалӣ ва ҳамкории мустақими донишҷӯён бо корфармоён ба имзо расид.

Ёддошти тафоҳуми ҳамкорӣ  дар доираи татбиқи самараноки «Барномаи ҷалби ҷавонон ба соҳаи таъмини оби нӯшокӣ ва рафъи обҳои партов» амалӣ карда мешавад. Барнома ҳамчун қисми таркибии лоиҳаи «Сармоягузорӣ ба бахши обтаъминкунӣ ва беҳдошти Тоҷикистон», ки аз ҷониби Бонки ҷаҳонӣ маблағгузорӣ мегардад, ба роҳ монда шудааст.

Ҳадафи асосии барнома фароҳам овардани заминаи мусоид барои омодасозии кадрҳои баландихтисос, баланд бардоштани маърифати касбӣ ва иштироки фаъоли ҷавонон дар рушди инфрасохтори обтаъминкунӣ ва беҳдошти санитарӣ мебошад.

АКС: Вазорати энергетика ва захираҳои оби Ҷумҳурии Тоҷикистон