ФУТБОЛ. Дастаи мунтахаби наврасони Тоҷикистон дар мусобиқаи «Ҷоми рушд-2026» иштирок мекунад

ДУШАНБЕ, 18.02.2026 /АМИТ «Ховар»/. Дастаи мунтахаби наврасони то 16-солаи Тоҷикистон оид ба футбол барои иштирок дар мусобиқаи байналмилалии «Ҷоми рушд-2026», ки аз 19 то 23 феврал баргузор мешавад, ба шаҳри Минск сафар кард.

Тавре ба АМИТ «Ховар» аз Федератсияи футболи Тоҷикистон хабар доданд, дар мусобиқа ҳашт даста иштирок  мекунад. Дастаи мунтахаби наврасони то 16-солаи Тоҷикистон дар гурӯҳи «А» бо тимҳои Беларус (U-17), Минск (U-17) ва Қазоқистон (U-17) рақобат хоҳад кард.

Дар гурӯҳи «B» дастаҳои наврасони Беларус (U-16), Русия (U-17), Узбекистон (U-17) ва Озарбойҷон (U-17) иштирок менамоянд.

Мувофиқи низомномаи мусобиқа, дастаҳо дар марҳилаи гурӯҳӣ бо ҳам дар як давр бозӣ мекунанд. Ғолибони гурӯҳ ба финал роҳ ёфта, тимое, ки ҷойи дуюмро мегиранд, барои медалҳои биринҷӣ мубориза мебаранд. Инчунин барои мақомҳои 5-6 ва 7-8-ум ҳам рақобатҳо баргузор мегарданд.

АКС: Федератсияи футболи Тоҷикистон