НИШАСТИ МАТБУОТӢ. Соли 2025 ба Тоҷикистон 1 миллиону 784 ҳазор сайёҳ ворид гардид
ДУШАНБЕ, 05.02.2026 /АМИТ «Ховар»/. Соли 2025 ба Тоҷикистон 1 миллиону 784,4 ҳазор сайёҳ ворид гардид. Аз ин шумора 1 миллиону 634,5 ҳазор нафар ба давлатҳои Иттиҳоди Давлатҳои Мустақил ва 149,9 ҳазор нафар ба давлатҳои хориҷи дур рост меояд. Дар ин хусус Раиси Кумитаи рушди сайёҳии назди Ҳукумати Ҷумҳурии Тоҷикистон Ҷамшед Ҷумахонзода 5 феврал зимни нишасти матбуотӣ ба хабарнигорон иттилоъ дод.
Гуфта шуд, ки соли 2025 шумораи умумии шаҳрвандони хориҷие, ки бо назардошти тамоми намудҳои сафар ба Ҷумҳурии Тоҷикистон омадаанд, 2 миллиону 104,7 ҳазор нафарро ташкил дод.
Ҷамшед Ҷумахонзода иброз дошт, ки сайёҳон асосан ба Тоҷикистон бо мақсади шиносоӣ бо таърих, фарҳанг ва табиати зебои ин сарзамин омада, ба сайёҳии кӯҳнавардӣ низ диққати махсус зоҳир менамоянд.
«Таҷрибаи байналмилалӣ нишон медиҳад, ки яке аз воситаҳои муҳими тарғиби иқтидори сайёҳӣ- ин иштирок дар намоишгоҳҳои байналмилалии соҳавӣ ва кашфи бозорҳои нав мебошад. Дар ин замина соли 2025 намояндагони соҳаи сайёҳии ҷумҳурӣ дар намоишгоҳҳо ва чорабиниҳои байналмилалии сайёҳӣ дар давлатҳои Олмон, Русия, Узбекистон, Чин, Эрон, Покистон, Италия, Филиппин, Озарбойҷон, Қирғизистон, Финландия, Британияи Кабир, Швейтсария ва Қатар иштирок намуданд»,-изҳор дошт раиси Кумитаи рушди сайёҳӣ.
Дар ҷараёни нишаст иттилоъ дода шуд, ки кумита дар заминаи имтиёзҳои пешниҳоднамудаи Ҳукумати мамлакат ва дар доираи татбиқи лоиҳаҳои сармоягузорӣ якҷо бо вазорату идораҳо, мақомоти иҷроияи маҳаллии ҳокимияти давлатӣ, соҳибкорон ва сокинони мамлакат барои бунёди инфрасохтори сайёҳӣ, омода намудани кадрҳои баландихтисос, баланд бардоштани сатҳу сифати хизматрасонӣ, рушд додани сайёҳии экологию табобатӣ ва кӯҳнавардӣ, зиёд намудани номгӯйи хизматрасониҳои сайёҳӣ, боло бурдани мавқеи байналмилалии давлат дар раддабандиҳои ҷаҳонӣ ва ташаккули бренди миллии сайёҳӣ тадбирҳои амалӣ меандешад.
Соли 2025 дар Тоҷикистон 367 субъекти хизматрасонии сайёҳӣ ба қайд гирифта шуд, ки нисбат ба соли 2024 20 адад зиёд мебошад. Инҳо 225 меҳмонхона, 61 модел ва хостел, 56 осоишгоҳ, 4 лагери солимгардонӣ, 6 маркази муолиҷавӣ, 10 хонаи истироҳатӣ, 1 пансионат ва 4 базаи сайёҳӣ мебошанд.
Моҳинави НАВРӮЗ,
АМИТ «Ховар»,
АКС: АМИТ «Ховар»
Дар Душанбе Фестивали байналмилалии «Наврӯз-мероси фарҳангию ҷаҳонгардӣ» доир мегардад
Дурнамои рушди ҳамкории Тоҷикистон ва Ҳиндустон дар соҳаи энергетика баррасӣ шуд
НАВРӮЗ-БРЕНДИ МИЛЛИИ САЙЁҲӢ. Сайёҳони хориҷӣ дар ин рӯзҳо бо таърих, фарҳанг ва расму оинҳои халқи тоҷик бештар шинос мегарданд
Пешвои миллат: «Кишоварзон бояд аз ҳар рӯзи мусоиди фасли баҳор истифода баранд»
БРЕНДИ САЙЁҲИИ ТОҶИКИСТОН. Ҷашни Наврӯз пули дӯстӣ байни миллатҳо мебошад
Эмомалӣ Раҳмон: «Кишоварзонро зарур аст рӯзҳои мусоиди баҳориро самаранок истифода намоянд»
Блогерон ва хабарнигорони расонаҳои хориҷӣ барои инъикоси Наврӯз ба Тоҷикистон меоянд
Ҷашни байналмилалии Наврӯз дар Бонки миллии Тоҷикистон дар сатҳи баланд таҷлил гардид
Наврӯз ҳамчун бренди миллӣ ва абзори «дипломатияи фарҳангӣ»: натиҷаҳо ва дурнамои Форуми V байналмилалии «Наврӯзи Душанбе – меҳвари робитаҳои фарҳангию сайёҳӣ»
Дар Душанбе истифода ва ҳифзи захираҳои обии мамлакат дар шароити тағйирёбии иқлим баррасӣ гардид
Ҷаласаи сеюми Гурӯҳи кории муштараки Тоҷикистону Покистон оид ба савдо, сармоягузорӣ ва нақлиёт баргузор шуд
Форуми V байналмилалии «Наврӯзи Душанбе – меҳвари робитаҳои фарҳангию сайёҳӣ» баргузор гардид
