Татбиқи лоиҳаи «Азнавпайвастшавӣ ба низоми ягонаи энергетикии Осиёи Марказӣ» баррасӣ гардид

ДУШАНБЕ, 13.02.2026 /АМИТ «Ховар»/. Татбиқи лоиҳаи «Азнавпайвастшавӣ ба низоми ягонаи энергетикии Осиёи Марказӣ» дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Вазири энергетикаи Ҷумҳурии Узбекистон Ҷурабек Мирзомаҳмудов дар шаҳри Тошканд баррасӣ гардид, иттилоъ медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Дар мулоқот таъкид гардид, ки бо ташаббус ва иродаи сиёсии сарони давлатҳо – Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Узбекистон муҳтарам Шавкат Мирзиёев муносибатҳои дуҷониба дар ҳама соҳаҳо, аз ҷумла энергетика бо суръат рушд карда, тавсеа меёбанд.

Дар мулоқот доираи васеи масъалаҳои ҳамкорӣ дар соҳаи энергетика, аз ҷумла, ҳамоҳангсозии содирот ва воридоти неруи барқ, махсусан дар давраи тирамоҳу зимистон баррасӣ гардид.

‎Дар анҷом ҷонибҳо аз сатҳи кунунии ҳамкорӣ изҳори қаноатмандӣ карда, барои таҳкими минбаъдаи муносибатҳои бародарона ва стратегӣ ба нафъи мардумони ҳарду давлат изҳори омодагӣ намуданд.

АКС: Вазорати энергетика ва захираҳои оби Ҷумҳурии Тоҷикистон