Дар ноҳияи Данғара фестивали бозиҳои миллӣ бо шукуҳи хосса баргузор шуд

ДАНҒАРА, 03.03.2026 /АМИТ «Ховар»/. Мувофиқи нақшаи чорабиниҳои Мақомоти иҷроияи ҳокимияти давлатии ноҳияи Данғара ва бахши кор бо ҷавонон ва варзиши ноҳия дар деҳаи Паркамчии ноҳия бо иштироки доираи васеи ҷавонону наврасон фестивали бозиҳои миллӣ баргузор гардид. Ҳадафи асосии чорабинӣ эҳё ва рушди бозиҳои миллӣ, тарғиби фарҳанги волои ниёгон ва таҳкими ҳисси ватандӯстиву худшиносӣ байни насли наврас арзёбӣ мегардад. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Данғара иттилоъ доданд.

Дар оғози фестивал муовини Раиси ноҳияи Данғара  Зуҳро Ҳакимзода иброз дошт, ки “бозиҳои миллӣ ҳамчун ҷузъи муҳими фарҳанги ғайримоддии халқи тоҷик дар тарбияи ҷисмониву маънавии ҷавонон нақши муассир дошта, барои тақвияти дӯстиву ҳамдигарфаҳмӣ ва эҳтиром ба арзишҳои миллӣ заминаи мусоид фароҳам меоранд”.

Дар чорабинӣ хонандагони Муассисаи таҳсилоти миёнаи умумии №27 фаъолона иштирок намуданд. Онҳо бо намоиши бозиҳои гуногуни миллӣ, аз қабили бозиҳои зеҳнӣ, варзишӣ ва суннатӣ, маҳорати худро пешкаши меҳмонон гардониданд. Иштирокчиён бо либосҳои миллӣ ҳусни чорабиниро дучанд намуда, фазои идона ба вуҷуд оварданд.

Фестивал дар фазои дӯстӣ, ҳамдигарфаҳмӣ ва рақобати солим доир шуда, дар байни хонандагон нисбат ба варзиш ва анъанаҳои миллӣ шавқу завқи бештар ба вуҷуд овард. Чунин иқдом барои дарёфти истеъдодҳои нав, ҷалби наврасон ба тарзи ҳаёти солим ва пешгирии омилҳои номатлуби иҷтимоӣ мусоидат менамоянд.

Фестивали бозиҳои миллӣ бори дигар собит намуд, ки ҷавонони ноҳияи Данғара ворисони арзандаи суннатҳои неки ниёгон буда, барои пос доштани фарҳанги миллӣ ва рушди он омода ва масъул мебошанд.

АКС: Мақомоти иҷроияи ҳокимияти давлатии ноҳияи Данғара