ТАНТАНАҲОИ НАВРӮЗӢ. Имрӯз дар боғҳои фарҳангӣ-фароғатии шаҳри Душанбе барномаҳои идона доир мешаванд

ДУШАНБЕ, 24.03.2026 /АМИТ «Ховар»/. Имрӯз ба муносибати Ҷашни байналмилалии Наврӯз дар боғҳои фарҳангӣ-фароғатии шаҳри Душанбе барномаҳои рангини фарҳангӣ баргузор мегарданд, иттилоъ доданд ба АМИТ «Ховар» аз шуъбаи иттилоотии дастгоҳи Раиси шаҳри Душанбе.

Аз ҷумла, бо мақсади дар сатҳи баланд таҷлил намудани Ҷашни байналмилалии Наврӯз имрӯз, соати 09:00 дар Майдони «800-солагии Москва» барномаи фарҳангӣ баргузор мегардад.

Ҳамзамон имрӯз, соати 17:00 дар Боғи фарҳангию фароғатии «Фирдавсӣ», Боғи фарҳангию фароғатии ба номи Садриддин Айнӣ, Майдончаи фарҳангу фароғатӣ, воқеъ дар кӯчаи Сино, Боғи фарҳангию фароғатии «Кӯли ҷавонон» ва Боғи фарҳангию фароғатии «Куруши Кабир» барномаҳои идона доир карда мешаванд.

Имрӯзҳо ба муносибати таҷлили бошукуҳи Ҷашни байналмилалии Наврӯз тамоми гулгашту хиёбон ва боғҳои фарҳангӣ-фароғатии шаҳри Душанбе зебу зиннат дода шудаанд. Дар онҳо гулҳои рангорангу дарахтони сояафкани гулпӯш ва дигар ороишоти рамзи баҳору Наврӯз насб гардида, ҳамарӯза сокинону меҳмонони пойтахт дар ин боғҳо сайру гашт менамоянд.

АКС: АМИТ «Ховар»