Абубакр аз Тоҷикистон ва Ҷасур аз Узбекистон соҳиби шоҳҷоизаҳои мусобиқаи гӯштини миллӣ дар Кӯлоб шуданд

ДУШАНБЕ, 02.04.2026 /АМИТ «Ховар»/. Дар рӯзҳои таҷлили Ҷашни байналмилалии Наврӯз бо ташаббуси Мақомоти иҷроияи ҳокимияти давлатии шаҳри Кӯлоб ва соҳибкорони бонангу номуси ин шаҳр дар Ҷамоати Зиракии деҳоти Офтоблиқои шаҳри Кӯлоб Мусобиқаи калони гӯштини миллӣ (гӯштингирӣ) бо ҳузури беш аз 30 ҳазор мухлис ва ҳаводорони варзиши тоҷик дар сатҳи баланд баргузор гардид. Дар мусобиқа паҳлавонони шинохтаи ҷумҳуриҳои Тоҷикистон, Узбекистон, Қазоқистон ва Федератсияи Русия иштирок намуданд.

Мусобиқаи гӯштини миллӣ дар шаҳри Кӯлоб хеле ҷолиб доир гардида, дар он беҳтарин паҳлавонон давоми беш аз 7 соат рақобат намуданд. Дар мусобиқа паҳлавонони шинохтаи тоҷик Шарифҷон Назриев, Хуршед Маҷидов, Фирдавс Насимов, Ғазалшои Давлатшо, Абубакри Акобир, Дадахон Қурбоналиев, Абубакр Шеров, Наврӯзи Каримзод, Ёсин Бобокалонов, Субҳиддин Халилзода, Шодмон Ризоев, Илҳомиддин Ҷабборов ва дигарон нисбат ба ҳарифонашон ҳунар ва маҳорати арзанда нишон дода, ҷоизаҳои олиро сазовор гардиданд.

Бояд гуфт, ки аз ҷониби ташкилкунандагони мусобиқа ба иштирокчиён туҳфаҳои гуногун, аз қабили мабалағҳои калони пулӣ ва 3 мошин ҳамчун Шоҳҷоиза гузошта шуд. Як мошинро паҳлавони шинохта Абубакр Шеров аз шаҳри Душанбе пас аз ғолиб омадан бар паҳлавони ҷавони ноҳияи Хуросон Ёсин Бобокалонов соҳиб гардид.

Ҳамчунин як Шоҳҷоизаи дигар байни ду паҳлавони шинохта- Шодмон Ризоев аз Ҷумҳурии Тоҷикистон ва Ҷасур аз Ҷумҳурии Узбекистон гузошта шуд. Ин варзишгарон давоми беш аз як соат рақобат карданд ва Ҷасур паҳлавон аз Ҷумҳурии Узбекистон Шоҳҷоиза- мошини электромобилро соҳиб гардид.

Меҳрони ҚУРБОН,
шореҳи варзиши АМИТ «Ховар»

АКС: АМИТ «Ховар»