Директори Агентии инноватсия ва технологияҳои рақамӣ бо намояндагони пешбари ширкатҳои технологии чинӣ вохӯрӣ намуд
ДУШАНБЕ, 13.05.2026 /АМИТ «Ховар»/. Дар доираи Форуми Tajik–China Digital Business Connect Директори Агентии инноватсия ва технологияҳои рақамии назди Президенти Ҷумҳурии Тоҷикистон бо намояндагони пешбари ширкатҳои технологии чинӣ ва платформаҳои байналмилалӣ вохӯрӣ намуд. Дар ин хусус ба АМИТ «Ховар» аз Агентии инноватсия ва технологияҳои рақамии назди Президенти Ҷумҳурии Тоҷикистон хабар доданд.
Ҳадафи вохӯриҳо тавсеаи ҳамкорӣ дар самтҳои гузариш ба низоми рақамӣ, инноватсия ва рушди технологӣ арзёбӣ мегардад. Аз ҷумла, бо раиси Guoxing Network Co., Ltd. Ян Юн (Yang Yong) ва директори Маркази пешбурди интернети саноатии Роҳи абрешим (Center for Promotion of Industrial Internet of Silk Road) вохӯрӣ баргузор гардид. Зимни он ҷонибҳо дурнамои ҳамкориро дар соҳаи интернети саноатӣ, ҷорӣ намудани технологияҳои 5G, зеҳни сунъӣ ва интернети ашё, омода намудани кадрҳои баландихтисос, инчунин татбиқи лоиҳаҳои муштараки озмоишӣ дар Тоҷикистон дар доираи ташаббуси Digital Silk Road баррасӣ намуданд.
Ҳамчунин вохӯрӣ бо менеҷери генералӣ оид ба шарикиҳои глобалии ByteDance (TikTok) Брюс Ченг (Bruce Cheng) доир шуд, ки дар ҷараёни он ҷонибҳо масъалаҳои рушди экосистемаи инноватсионӣ, дастгирии стартапҳо, муҳтавои рақамӣ, омодасозии кадрҳои соҳаи тенологияҳои иттилоотӣ ва табодули таҷрибаи байналмилалӣ дар самти гузариш ба низоми рақамиро муҳокима карданд.
Бо директори иҷроияи бахши тиҷорати ҷаҳонии хизматрасониҳои давлатии Huawei Саид Ся (Saeed Xia) низ вохӯрӣ баргузор гардид. Дар доираи он имконияти ҳамкорӣ дар самти гузариш ба низоми рақамӣ дар бахши давлатӣ, рушди инфрасохтори рақамӣ, татбиқи қарорҳо дар соҳаи ҳукумати электронӣ, технологияҳои абрӣ, зеҳни сунъӣ, амнияти киберӣ ва омодасозии мутахассисони соҳаи технологияҳои иттилоотӣ мавриди баррасӣ қарор гирифтанд.
Дар анҷом президенти Zhonghe Silk Road Digital Technology Co., Ltd. бо Тонг Дан (Danny Tong) вохӯрӣ намуд. Зимни он дурнамои татбиқи лоиҳаҳои муштарак дар самтҳои шаҳри ҳушманд (Smart City), иқтисоди рақамӣ, технологияҳои инноватсионӣ, инфрасохтори рақамӣ ва таҳкими шарикии технологӣ байни Тоҷикистон ва Чин дар доираи ташаббуси Роҳи абрешими рақамӣ муҳокима гардид.
АКС: Агентии инноватсия ва технологияҳои рақамии назди Президенти Ҷумҳурии Тоҷикистон
Дар Хатлон масоили рушди ҳамкории сармоягузорӣ ва боғдорӣ баррасӣ гардид
НИШАСТИ МАТБУОТӢ. Ҳаҷми истеҳсоли неруи барқ дар неругоҳҳо ва марказҳои барқу гармидиҳии ҶСК «Барқи Тоҷик» беш аз 8 миллиард кВт-соатро ташкил дод
Таҷриба ва ташаббусҳои Тоҷикистон оид ба рушди иқтисоди рақамӣ дар ҷаласаи сатҳи баланди кишварҳои рӯ ба тараққии маҳсур дар хушкӣ (LLDCs) муаррифӣ шуд
НИШАСТИ МАТБУОТӢ. Дар озмоишгоҳҳои «Тоҷикстандарт» чӣ миқдор маҳсулоти ғайристандартӣ ошкор гардид?
НИШАСТИ МАТБУОТӢ. Кумитаи хоҷагии манзилию коммуналӣ ба истифодабарандагон ба маблағи беш аз 62 миллион сомонӣ хизмат расонидааст
НИШАСТИ МАТБУОТӢ. Дар шаш моҳ 1 ҳазору 750 ҳолати вайронкунии қоидаҳои истифодаи неруи барқ ошкор гардид
Намояндагони Тоҷикистон дар ҷаласаи 69-уми Шурои байнидавлатӣ оид ба стандартизатсия иштирок намуданд
Эмомалӣ Раҳмон: «Бунёди «Комбинати металлургии Тоҷик» рамзи иқтидори рӯзафзуни иқтисодии мамлакат аст»
Пешвои миллат Эмомалӣ Раҳмон соҳибкоронро ба сармоягузорӣ дар истеҳсолот ва коркарди ашёи хоми ватанӣ даъват намуданд
Эмомалӣ Раҳмон: ««Барномаи рушди металлургияи сиёҳ барои солҳои 2027–2035» таҳия карда шавад»
Эмомалӣ Раҳмон: «Тоҷикистон бояд аз кишвари истихроҷкунандаи маъдан ба истеҳсолкунандаи маҳсулоти металлӣ табдил ёбад»
Талаботи Тоҷикистон ба филизоти сиёҳ то соли 2035 ба беш аз 2,3 миллион тонна мерасад
