Китоби нав таҳти унвони «Зиёӣ» ба табъ расид

ДУШАНБЕ, 14.06.2026 /АМИТ «Ховар»/. Ба истиқболи 35-солагии Истиқлоли давлатии Ҷумҳурии Тоҷикистон китоби нави сармуҳаррири нашрияи «Омӯзгор» Эҳсон Сафарзода бо номи «Зиёӣ» ба табъ расид, хабар медиҳад АМИТ «Ховар».

Китоб фарогири мақолаҳои муаллиф буда, дар меҳвари навиштаҳо фаъолияти Пешвои миллат ҳамчун намунаи олии зиёӣ, худшиносиву худогоҳии миллӣ, ифтихори ватандорӣ, рисолати зиёӣ дар замони муосир, дӯст доштани Ватан ва дар маҷмуъ, маърифатманд намудани ҷомеа қарор дорад. Муҳаққиқ бо дидгоҳи амиқи илмӣ ва таҳлили воқеъбинона ин масъалаҳоро мавриди омӯзиш қарор дода, пешниҳоду андешаҳои судманд ироа намудааст.

Омӯзиши ин китоб барои аҳли илму маориф, муҳаққиқон, устодону омӯзгорон, хонандагону донишҷӯён ва алоқамандони таълиму тарбия муфид мебошад.

Ёдовар мешавем, ки Эҳсон Сафарзода муаллиф ва мураттиби як қатор монография, дастурҳои таълимӣ ва китобҳои илмӣ-таълимӣ, аз ҷумла, «Устод Айнӣ ва ҳувияти миллӣ» (2018), «Садриддин Айнӣ – маорифпарвар» (2018, мураттиб), «Нури дониш» (2018, мураттиб), «Ҳувияти миллӣ дар осори публитсистии Садриддин Айнӣ» (2019), «Маҷмуаи дарсҳо оид ба расонаҳои нав» (2021), «Назаре ба публитсистикаи сиёсии устод Айнӣ» (2023), «Президент, истиқлол, ваҳдат, маориф» (2024), «Муаррифгари миллати тоҷик» (2024), «Нақши Иҷлосияи тақдирсози миллат ва Президенти Ҷумҳурии Тоҷикистон дар таҳкими Истиқлоли давлатӣ» (2024, мураттиб), «Замоне бо «Омӯзгор»» (2024, мураттиб), «Омӯзгори ман – ифтихори ман» (2024, мураттиб), «Устод Айнӣ, таърих ва сиёсат» (2025), инчунин беш аз 200 мақолаи илмӣ, публитсистӣ ва таълимию тарбиявӣ мебошад.

АКС: АМИТ «Ховар»