Муовини Сарвазири Тоҷикистон бо рафти кишти такрорӣ дар ноҳияи Зафаробод шинос шуд

ДУШАНБЕ, 22.06.2026 /АМИТ «Ховар»/. Муовини Сарвазири Ҷумҳурии Тоҷикистон Сулаймон Зиёзода бо фаъолияти корҳои саҳроӣ, вазъи парвариши пахта, кишти такрорӣ, истифодаи усулҳои муосири кишоварзӣ ва ҳолати таъминоти оби полезӣ дар хоҷагиҳои ноҳияи Зафаробод шинос шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Зафаробод хабар медиҳад, Сулаймон Зиёзода ба кишоварзон ва масъулони соҳа масъалаҳои истифодаи самараноки замин, баланд бардоштани ҳосилнокии зироат, вусъат бахшидани кишти такрорӣ ва татбиқи технологияҳои инноватсиониро мавриди баррасӣ қарор дод.

Муовини Сарвазир саҳми деҳқонони ноҳияи Зафарободро дар таъмини амнияти озуқавории мамлакат муҳим арзёбӣ намуд. Ба кишоварзони ноҳия  барои боз ҳам беҳтар намудани нишондиҳандаҳои истеҳсолӣ,  ҷиҳати истифодаи оқилонаи замин, фаровон гардидани ҳосил, гирифтани ду –се ҳосил  аз як замин тавсияҳо дода шуд.

Таъкид гардид, ки иҷрои саривақтии тадбирҳои агротехникӣ, истифодаи оқилонаи захираҳои обу замин ва амалӣ намудани таҷрибаҳои пешқадами кишоварзӣ омили асосии ба даст овардани ҳосили фаровон ва рушди минбаъдаи соҳаи пахтакорӣ ба ҳисоб меравад.

АКС: Мақомоти иҷроияи ҳокимияти давлатии ноҳияи Зафаробод