Намояндагони Тоҷикистон ва БОР лоиҳаи идоракунии обанбори «Баҳри Тоҷик»-ро баррасӣ намуданд

ДУШАНБЕ, 13.06.2026 /АМИТ «Ховар»/. Лоиҳаи «Идоракунии самараноки захираҳои оби обанбори «Баҳри Тоҷик» дорои аҳамияти фаромарзӣ ва минтақавӣ мебошад. Ин нукта дар вохӯрии Ёрдамчии Президенти Ҷумҳурии Тоҷикистон оид ба масъалаҳои иқтисодӣ Неъматулло Ҳикматуллозода, Вазири энергетика ва захираҳои оби Ҷумҳурии Тоҷикистон Далер Ҷумъа бо намояндагони воломақоми минтақавии Бонки Осиёии рушд – директори генералии дафтари Осиёи Марказӣ ва Ғарбӣ Леи Гутеррес, роҳбари минтақавӣ оид ба ҳамкорӣ ва ҳамгироии минтақавӣ Асад Алим дар Улан-Батор баён гардид.

АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад, ки дар меҳвари суҳбати ҷонибҳо масъалаҳои марбут ба лоиҳаи «Идоракунии самараноки захираҳои оби обанбори «Баҳри Тоҷик»» қарор гирифт.

Зимни мулоқот Неъматулло Ҳикматуллозода гуфт, ки ин лоиҳа дорои аҳамияти фаромарзӣ ва минтақавӣ буда, ба гурӯҳи «Лоиҳаҳои инфрасохтории мутобиқшаванда ба тағйирёбии иқлим, ки барои мамлакат манфиат меоранд» шомил мебошад.

Таъкид шуд, ки дар доираи лоиҳа мустаҳкамсозии садҳои муҳофизатии обанбор барои пешгирии хавфи обхезиҳо, таҷдиду навсозии пойгоҳҳои обкашӣ, беҳтар намудани ҳолати мелиоративии заминҳо ва заҳбуру заҳкашҳо, инчунин ҷорӣ намудани низоми муосири рақамии идоракунӣ (SCADA) пешбинӣ шудааст.

Татбиқи лоиҳа барои ба роҳ мондани идоракунии самараноки захираҳои оби обанбори «Баҳри Тоҷик» дар шароити тағйирёбии иқлим, баланд бардоштани эътимоднокии таъминоти об барои обёрӣ ва афзоиши иқтидори истеҳсоли неруи барқ мусоидат хоҳад кард.

Ҳамчунин изҳор гардид, ки асосноккунии пешакии техникӣ-иқтисодии лоиҳа бо дастгирии Бонки Осиёии рушд таҳия гардидааст.

АКС: Вазорати энергетика ва захираҳои оби Ҷумҳурии Тоҷикистон