Тоҷикистон ва Беларус ҳамкории зиддикоррупсиониро тақвият мебахшанд

ДУШАНБЕ, 05.06.2026 /АМИТ «Ховар»/. Дар доираи Нақшаи чорабиниҳои муштарак оид ба амалисозии «Созишномаи ҳамкорӣ байни Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Прокуратураи генералии Ҷумҳурии Беларус барои солҳои 2025–2026» чорабинии маҷозӣ баргузор гардид. Дар ин хусус ба АМИТ «Ховар» аз Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар доданд.

Зимни чорабинӣ масъулини ду ниҳод масъалаҳои муқовимат ба коррупсия ва нақши ҷомеаи шаҳрвандиро дар пешгирӣ ва мубориза бо ин зуҳурот баррасӣ намуданд.

Таъкид гардид, ки мубориза бо коррупсия яке аз самтҳои муҳими сиёсати давлатӣ дар ҳарду ҷумҳурӣ буда, ҷонибҳо доир ба таҷриба, роҳу усулҳои муосири коҳиш додани сатҳи коррупсия ва ҷалби бештари ҷомеа ба ин раванд мубодилаи афкор анҷом доданд.

Ҳамчунин масъалаҳои густариши ҳамкории байниидоравӣ дар самти татбиқи сиёсати зиддикоррупсионӣ, расонидани ёрии амалӣ вобаста ба маводи санҷишӣ ва парвандаҳои ҷиноятӣ, баргузории чорабиниҳои муштарак ва дигар самтҳои ҳамкорӣ мавриди баррасӣ қарор гирифтанд.

Дар анҷоми чорабинӣ ҷонибҳо изҳор доштанд, ки муносибатҳои ҳамкорӣ байни мақомоти зиддикоррупсионии Тоҷикистон ва Беларус дар сатҳи баланд қарор дошта, барои таҳким ва рушди минбаъдаи онҳо тадбирҳои зарурӣ амалӣ карда мешаванд.

АКС: Агентии назорати давлатии молиявӣ ва мубориза бо коррупсияи Ҷумҳурии Тоҷикистон