Дар ноҳияи Ёвон бахшида ба ташаббуси навбатии ҷаҳонии Тоҷикистон конференсия ва роҳпаймоии сулҳ баргузор гардид

ДУШАНБЕ, 17.07.2026 /АМИТ «Ховар»/. Имрӯз дар ноҳияи Ёвон бахшида ба қабули қатъномаи Маҷмаи Умумии Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036» конференсияи ноҳиявӣ ва роҳпаймоии тантанавии сулҳ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон хабар доданд.

Дар конференсия Раиси ноҳияи Ёвон Икромиддин Вализода, роҳбарони мақомоти ҳифзи ҳуқуқ, роҳбарону кормандони ташкилоту муассисаҳо, намояндагони ҷомеаи шаҳрвандӣ, ҷавонон, омӯзгорон, фаъолон ва сокинони ноҳия иштирок намуданд.

Зимни конференсия таъкид гардид, ки қабули қатъномаи Маҷмаи Умумии Созмони Милали Муттаҳид оид ба эълони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036» дастоварди муҳими сиёсати хориҷии Ҷумҳурии Тоҷикистон ва натиҷаи ташаббусҳои созандаву сулҳпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон мебошад.

Иброз гардид, ки ин иқдоми байналмилалӣ идомаи мантиқии ташаббусҳои ҷаҳонии Тоҷикистон буда, нуфуз ва мавқеи мамлакатро ҳамчун давлати пешоҳанги ташаббусҳои сулҳпарварона дар арсаи байналмилалӣ боз ҳам таҳким мебахшад.

Иштирокчиёни конференсия вобаста ба аҳаммияти таърихии қатъномаи қабулшуда андешаронӣ намуда, таъкид карданд, ки татбиқи ҳадафҳои даҳсолаи нав барои таҳкими фарҳанги сулҳ, таҳаммулпазирӣ, муколамаи байни тамаддунҳо, рушди ҳамкорӣ байни давлатҳо ва таъмини зиндагии осоишта барои наслҳои имрӯз ва оянда аҳаммияти бузург дорад.

Ҳамчунин иброз гардид, ки ҳифзи сулҳу субот ва ваҳдати миллӣ вазифаи муқаддаси ҳар як шаҳрванди мамлакат мебошад.

Дар идомаи чорабинӣ роҳпаймоии тантанавии сулҳ таҳти шиори «Аз сулҳ то созандагӣ — ба хотири наслҳои оянда!» баргузор гардид.

Дар роҳпаймоӣ раиси ноҳияи Ёвон Икромиддин Вализода, роҳбарони мақомоти ҳифзи ҳуқуқ, намояндагони ташкилоту муассисаҳо, ҷавонон, варзишгарон, омӯзгорон ва дигар фаъолони ҷомеа иштирок намуда, бо парчамҳои давлатӣ ва шиору овезаҳои тараннумкунандаи сулҳу дӯстӣ аз кӯчаҳои марказии ноҳия гузаштанд.

Таъкид гардид, ки ҳадафи роҳпаймоӣ арҷгузорӣ ба сулҳу суботи пойдор, таҳкими ваҳдати миллӣ, баланд бардоштани ҳисси ватандӯстӣ ва пуштибонии ташаббуси ҷаҳонии Ҷумҳурии Тоҷикистон оид ба пешбурди фарҳанги сулҳ мебошад, ки бо пешниҳоди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз ҷониби Созмони Милали Муттаҳид пазируфта шудааст.

Иштирокчиёни роҳпаймоӣ садоқати худро ба арзишҳои муқаддаси сулҳ, дӯстӣ, ҳамдигарфаҳмӣ ва ҳамзистии осоишта иброз дошта, саҳми Тоҷикистонро дар таҳкими сулҳу амнияти байналмилалӣ баланд арзёбӣ намуданд.

Тазаккур дода шуд, ки сулҳ неъмати бузургтарин ва заминаи асосии рушди устувори давлат буда, танҳо дар фазои орому осуда метавон барои пешрафти иқтисод, илму маориф, фарҳанг, варзиш ва тарбияи насли соҳибмаърифату ватандӯст шароити мусоид фароҳам овард.

Тавре иштирокчиёни чорабинӣ иброз доштанд, сокинони ноҳияи Ёвон ҳамчун ҷонибдорони сиёсати созандаву сулҳпарваронаи роҳбарияти олии мамлакат минбаъд низ барои татбиқи ҳадафҳои «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036», ҳифзи сулҳу оромӣ, таҳкими ваҳдати миллӣ ва рушди устувори Тоҷикистон саҳми арзандаи худро мегузоранд.

АКС: Мақомоти иҷроияи ҳокимияти давлатии ноҳияи Ёвон