Дар Сангвор бахшида ба қабули Даҳсолаи байналмилалӣ оид ба таҳкими сулҳ барои наслҳои оянда ҳамоиш баргузор гардид

САНГВОР, 02.07.2026 /АМИТ «Ховар»/. Бо мақсади арҷгузорӣ ба ташаббуси навбатии байналмилалии Ҷумҳурии Тоҷикистон ва муаррифии аҳамияти таърихии қабули қатъномаи Созмони Милали Муттаҳид «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036» дар ноҳия Сангвор ҳамоиши бошукӯҳи сиёсиву фарҳангӣ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Сангвор хабар доданд.

Муовини раиси ноҳияи Сангвор Садорат Бафозода иброз дошт, ки қабули ин қатъномаи муҳими Созмони Милали Муттаҳид дастоварди бузурги сиёсати хориҷии Ҷумҳурии Тоҷикистон ва нишонаи эътирофи нақши Президенти Тоҷикистон муҳтарам Эмомалӣ Раҳмон дар таҳкими сулҳу суботи ҷаҳонӣ мебошад.

Изҳор гардид, ки Тоҷикистон аз рӯзҳои аввали соҳибистиқлолӣ таҳти роҳбарии хирадмандонаи Пешвои миллат сиёсати сулҳҷӯёна, ҳамдигарфаҳмӣ ва ҳамкории созандаро пеш гирифта, имрӯз ҳамчун давлати ташаббускор ва сулҳпарвар дар арсаи байналмилалӣ мавқеи шоиста касб намудааст.

Таъкид шуд, ки қатъномаи навбатии Созмони Милали Муттаҳид бори дигар собит сохт, ки ҷомеаи ҷаҳонӣ ташаббусҳои инсондӯстона ва созандаи Тоҷикистонро баланд арзёбӣ менамояд. Сулҳ неъмати бебаҳо, асоси рушду пешрафти давлат ва кафили зиндагии шоистаи мардум мебошад. Аз ин рӯ, қабули «Даҳсолаи байналмилалӣ оид ба таҳкими сулҳ барои наслҳои оянда» идомаи мантиқии ташаббусҳои ҷаҳонии Ҷумҳурии Тоҷикистон буда, барои густариши ҳамкории байналмилалӣ, таҳкими фарҳанги сулҳ, пешгирии низоъҳо ва тарбияи насли оянда дар руҳияи инсондӯстиву ҳамдигарфаҳмӣ заминаи мусоид фароҳам меорад.

Сокинони ноҳияи Сангвор аз чунин ташаббусҳои сатҳи ҷаҳонии Тоҷикистон ифтихор намуда, минбаъд низ барои татбиқи сиёсати созандаи давлату Ҳукумат, ҳифзи сулҳу субот, таҳкими ваҳдати миллӣ ва ободии Ватани азизамон саҳми арзандаи худро мегузоранд.

АКС: Мақомоти иҷроияи ҳокимияти давлатии ноҳияи Сангвор