Дар пойтахти Тоҷикистон Рӯзи фарҳанги шаҳри Бохтар доир шуд

ДУШАНБЕ, 01.08.2026 /АМИТ «Ховар»/. Имрӯз дар Боғи фарҳангию фароғатии ба номи Абулқосим Фирдавсӣ Рӯзи фарҳанги шаҳри Бохтар бо пешниҳоди намоиши маҳсулоти кишоварзӣ ва ҳунарҳои мардумӣ доир шуд, иттилоъ медиҳад АМИТ «Ховар».

Рӯзи фарҳанги шаҳри Бохтар бо тамошои намоишгоҳи дастовардҳо оғоз гардид. Меҳмонон аз гӯшаҳои намоишӣ дидан намуда, бо намунаҳои беҳтарини маҳсулоти кишоварзӣ, аз ҷумла сабзавоту полезӣ, мева, маҳсулоти саноатӣ, маҳсули фаъолияти соҳибкорон, ҳунарҳои мардумӣ, дастовардҳои соҳаҳои маориф, фарҳанг ва варзиш шинос шуданд.

Дар намоишгоҳ намунаҳои беҳтарини чакандӯзӣ, зардӯзӣ, қолинбофӣ, кулолгарӣ, кандакорӣ ва дигар ҳунарҳои миллӣ ба маърази тамошо гузошта шуда, маҳорати ҳунармандони ноҳия диққати меҳмононро ҷалб намуд. Ҳамчунин намунаҳои гуногуни таомҳои миллӣ, шириниҳо ва маҳсулоти коркарди ватанӣ пешкаши ҳозирин гардиданд.

Таъкид гардид, ки шаҳри Бохтар имрӯз ҳамчун яке аз шаҳрҳои пешқадами ҷумҳурӣ дар самтҳои кишоварзӣ, саноат, маориф, тандурустӣ, фарҳанг ва варзиш ба дастовардҳои назаррас ноил гардида, дар доираи омодагиҳо ба ҷашни 35-солагии Истиқлоли давлатӣ даҳҳо иншооти иҷтимоию иқтисодӣ бунёд ва мавриди истифода қарор гирифтаанд.

Бохтар дорои мавзеъҳои ҷолиби сайёҳист. Дар шаҳр теппаи ба таври сунъӣ сохташуда, наҳрҳои Ҷӯйбору Бибихонум, муҷассамаҳои Исмоили Сомонӣ, Рӯдакӣ, Ҷалолиддини Балхӣ, муҷассамаи трактор ҳамчун рамзи рушди кишоварзӣ, лавҳаи азхудкунии заминҳои водии Вахш, манораҳои Парчам ва Нишони давлатӣ аз ҷумлаи маъруфтарин мавзеъҳо ба ҳисоб мераванд. Дар шаҳри Бохтар барои меҳмонони дохиливу хориҷӣ шароити мусоиди хизматрасонӣ фароҳам оварда шудааст.

АКС: АМИТ «Ховар»