Маҳсулоти кишоварзии Тоҷикистон бо сифати аъло дар бозорҳои хориҷӣ мавқеи муносиб пайдо кардааст

ДУШАНБЕ, 12.10.2026 /АМИТ «Ховар»/. Маҳсулоти кишоварзии Тоҷикистон бо таъму сифати аъло  дар бозорҳои хориҷӣ мавқеи муносиб пайдо карда, содироти он яке аз самтҳои муҳими рушди соҳаи кишоварзӣ ва таҳкими робитаҳои тиҷоратию иқтисодии кишвар  ба ҳисоб меравад. Дар ин замина, воридоти ангур ва дигар маҳсулоти тару тозаи кишоварзии Тоҷикистон ба  бозорҳои хориҷӣ дар муаррифии имкониятҳои истеҳсолии мамлакат, дастгирии кишоварзон ва афзоиши ҳаҷми содироти маҳсулот  аҳаммияти муҳим дорад.

Ба таъкид мухбири АМИТ «Ховар» дар Федератсияи Русия, вилояти Пенза аз ҷумлаи минтақаҳое  мебошад, ки метавонад  барои густариши ҳамкории  тиҷоратӣ  дар  самти  таъмини аҳолии вилоят  бо маҳсулоти кишоварзии Тоҷикистон заминаи муносиб фароҳам оварад.  Содироти ангур ва дигар маҳсулоти кишоварзӣ ба ин минтақа дар баробари таъмини талаботи бозор, барои таҳкими робитаҳои иқтисодии ду ҷониб ва тавсеаи доираи шарикони тиҷоратӣ замина мегузорад.

Ангури Тоҷикистон бо таъми нотакрор, сифати баланд ва гуногуннавъӣ аз маҳсулоти серталаби мавсимӣ ба шумор меравад. Иқлими мусоид, заминҳои ҳосилхез ва таҷрибаи чандинсолаи кишоварзони тоҷик барои парвариши маҳсулоти босифат имконият фароҳам овардаанд. Ҳамзамон, истеҳсол ва содироти дигар маҳсулоти кишоварзӣ, метавонад ба васеъ гардидани имкониятҳои бозорёбии маҳсулоти ватанӣ мусоидат намояд.

Барои таъмини рақобатпазирии маҳсулот дар бозорҳои хориҷӣ риояи талаботи сифат ва бехатарии озуқаворӣ, дуруст ба роҳ мондани ҷамъоварӣ, ҷудокунии маҳсулот аз рӯйи навъу сифат, бастабандии муносиб ва нигоҳдории он аҳаммияти хос дорад. Ин омилҳо на танҳо ба ҳифзи сифати маҳсулот ҳангоми интиқол, балки ба баланд бардоштани эътимоди шарикони тиҷоратӣ низ мусоидат мекунанд.

Густариши содироти маҳсулоти кишоварзӣ ҳамзамон барои фароҳам овардани имкониятҳои нави иқтисодӣ, дастгирии фаъолияти хоҷагиҳои деҳқонӣ, рушди соҳибкорӣ ва таъсиси ҷойҳои нави корӣ заминаи мусоид фароҳам меорад. Ҳар қадар маҳсулоти ватанӣ дар бозорҳои хориҷӣ мавқеи устувор пайдо намояд, ҳамон андоза имкониятҳои истифодаи самараноки иқтидори истеҳсолии кишвар бештар мегарданд.

Дар маҷмуъ, содироти ангур ва дигар маҳсулоти кишоварзии Тоҷикистон ба вилояти Пензаи Федератсияи Русия яке аз самтҳои муҳими тавсеаи робитаҳои тиҷоратӣ буда, рушди минбаъдаи ин он метавонад ба муаррифии имкониятҳои кишоварзии мамлакат ва таҳкими мавқеи маҳсулоти ватанӣ дар бозорҳои хориҷӣ мусоидат намояд.

АКС: АМИТ «Ховар»