ҲУДУДҲОИ МИНТАҚАҲОИ ОЗОДИ ИҚТИСОДИИ «СУҒД» ВА «ПАНҶ» МУАЙЯ

                   Душанбе, 22 июн.(АМИТ «Ховар», Марзия Саидова).- «Лоиҳаи Қонунҳои Ҷумҳурии Тоҷикистон «Дар бораи мақомоти худидораи шаҳрак ва маҳал», «Дар бораи забони давлатии Ҷумҳурии Тоҷикистон», «Оид ба ворид намудани илова ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2009», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи Гвардияи миллии Ҷумҳурии Тоҷикистон», «Дар бораи ворид намудани тағйирот ба Қонуни Ҷумҳурии Тоҷикистон «Дар бораи роҳҳои автомобилгард ва фаъолияти роҳдорӣ» аз масъалаҳое буданд, ки 22 июн дар ҷаласаи Шӯрои Маҷлиси намояндагон баррасӣ гардиданд.                  Дар ҷаласа ҳамчунин, Созишнома байни Ҷумҳурии Тоҷикистон ва Ҷумҳурии Латвия оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармоя, Созишномаи қарзи байни Ҳукумати Ҷумҳурии Тоҷикистон ва Бонки содироту воридоти Хитой ва оид ба сарҳадҳои ҳудудии Минтақаҳои озоди иқтисодии «Суғд» ва «Панҷ» муҳокима гардиданд.                Зимни баррасии масъалаҳо, раисони Кумитаҳои Маҷлиси намояндагон зикр карданд, ки ворид намудани тағйиру иловаҳо ба лоиҳаи Қонунҳои мазкур ин мувофиқ намудани номи шаҳраку деҳот ба меъёрҳои забони тоҷикӣ, баланд бардоштани мақоми забони давлатӣ, тақвият бахшидани фаъолияти Гвардияи миллӣ, мутобиқ намудани роҳҳои кишвар ба меъёрҳои ҷумҳуриявӣ, минтақавӣ ва байналмилалӣ, густариши робитаҳои Тоҷикистон бо Латвия ва Бонки содироту воридоти Чин ва муайян намудани ҳудудҳои сарҳадии Минтақаҳои озоди иқтисодии «Суғд» ва «Панҷ» мебошад.