КОРМАНДИ ШКД-И НОҲИЯИ ҲИСОРРО ҲАБС КАРДАНД

               Душанбе, 24 июня. ( АМИТ «Ховар», Анварбек Сиддиқов). — Дар коллегияи судӣ оид ба парвандаҳои ҷиноии Суди Олии ҷумҳурӣ баррасии парвандаи ҷиноӣ нисбат ба ваколатдори калони шӯъбаи кофтукови ҷиноии ШКД-и ноҳияи Ҳисор Рустамҷон Орзуев ба охир расид.                Тавре аз Суди Олии ҷумҳурӣ ба АМИТ «Ховар» иттилоъ доданд, номбурдаро бо даст доштан дар порагирӣ гунаҳкор намуданд ва бо ҳукми суд ба мӯҳлати 4 сол аз озодӣ маҳрум намуданд.                Дар ҷараёни тафтишот муайян карда шуд, Р. Орзуев моҳи январ бо мақсади ғаразнок аз сокини ноҳияи Ҳисор Толибҷон Саидов 350 доллари ИМА барои дохил кардани маълумоти бардурӯғ ба ҳуҷҷатҳои расмии ӯ талаб кардааст. 27 январ Р. Орзуевро ҳангоми гирифтани пора кормандони Агентии назорати давлатии моливӣ ва мубориза бо коррупсияи Ҷумҳурии Тоҷикистон боздошт намуданд.