АМАЛИЁТИ ҲАРБӢ ДАР ҚИСМАТИ ШИМОЛИИ АФҒОНИСТОН

                Кобул, 25 июл. (АМИТ «Ховар»-Лента.ру).- Дар қисмати шимолии Афғонистон амалиёти доманадори ҳарбии қисмҳои низомии Олмон ва артиши Афғонистон анҷом ёфт. Дар натиҷа пойгоҳи асосии низомии силоҳбадастони толибон дар қисми шимолии Афғонистон-шаҳри Чордара таҳти назорати қисмҳои ҳарбии эътилофӣ ва артиши Афғонистон қарор гирифт.               Аз рӯи хабарҳои расида дар ҷараёни амалиёт 13 силоҳбадаст кушта, шумораи хеле зиёди онҳо маҷрӯҳ гардиданд. Инчунин 4 аскари ҳукуматӣ ҳалок гардид. Аз ҷумлаи низомиёни олмонӣ касе осеб надидааст. Қайд карда мешавад, ки дар ҷараёни амалиёт аз техникаи зиреҳпӯш ва аслиҳаи вазнин истифода бурда шуд.              Вазири мудофиаи ҶФО Франс Йозеф Юнг зикр кард, ки дар амалиёт 300 аскару афсари мамлакат иштирок намуд. Ф. Юнг изҳор намуд, ки амалиёти дар қисми шимолии Афғонистон анҷомёфта, амалиёти ҳарбӣ набуда, балки яке аз тадбирҳои ба эътидол овардани вазъият мебошад.               Хабар дода мешавад, ки аз се ду ҳиссаи аҳолии Олмон тарафдори ҳар чи зудтар аз Афғонистон баровардони низомиёни мамлакат мебошад. Вале вазири мудофиаи Олмон изҳор намуд, ки низомиёни мамлакаташ дар Афғонистон боз камаш то 10 соли дигар боқӣ хоҳанд монд.