БАРРАСИИ ЛОИҲАИ СОЗИШНОМАИ ҲАМКОРӢ

                Душанбе, 7 июл. (АМИТ «Ховар», Нагис Бояхмедова).- Имрӯз дар шаҳри Минск машварати навбатии гурӯҳи коршиносони давлатҳои ИДМ баргузор гардид. Дар он лоиҳаи созишномаи ҷустуҷӯи байнидавлатии одамон ва созишномаи тартиби ташкил ва фаъолияти гурӯҳҳои муштараки тафтишотӣ дар қаламрави ИДМ мавриди баррасӣ қарор дода шуданд. Лоиҳаи созишнома пешбинӣ мекунад, ки мақомоти салоҳиятдори давлатҳои ИДМ дархости мамлакатҳои манфиатдорро дар бораи гузаронидани тадбирҳои таъҷилии ҷустуҷӯи байнидавлатии одамон иҷро намуда, фаъолияташонро роҷеъ ба ин масъала ҳамоҳанг сохта, ба ҳамдигар маълумоти зарурӣ дода, таҷрибаи ҳамдигарро меомӯзанд. Дар ин маврид одамоне ҷустуҷӯ карда мешаванд, ки мувофиқи парвандаҳои ҷиноӣ ва қарори суд аз иҷрои ҳукм саркашӣ кардаанд, инчунин одамони беному нишон гумшуда ва бо аҳли оилаашон алоқа надошта ва онҳое, ки дар бораи маҳалли истиқоматашон бо ин ё он сабаб хабар дода наметавонанд, ҷустуҷӯ карда мешаванд.                Дар лоиҳаи созишнома гуфта мешавад, ки гурӯҳҳои муштараки тафтишотӣ барои тафтиши ҳамаҷонибаи ҷиноятҳои содиршуда дар қаламрави ин ё он мамлакат ташкил карда мешаванд. Дар ҳуҷҷат вазифаҳои асосӣ, тартиби ташкил ва фаъолияти чунин гурӯҳҳо муайян карда шудаанд.