БЕҲТАРИН МАҲСУЛОТИ ТОҶИКИСТОН МОЛИ КИСТ?

                      Душанбе, 2 июл.(АМИТ «Ховар», Марзия Саидова).-25 июл дар шаҳри Душанбе озмуни ҷумҳуриявии «Маҳсулоти беҳтарини Тоҷикистон» ҷамъбаст мегардад.                      Аз Агентии стандартизатсия, метрология, сертификат ва нозироти савдои ҷумҳурӣ ба АМИТ «Ховар» иттилоъ доданд, ки даври вилоятӣ ва минтақавии озмун дар вилоятҳои Суғду Хатлон, ноҳияҳои тобеи марказ ва шаҳри Душанбе ҷамъбаст гардида, ғолибони он ба даври ҷумҳуриявӣ роҳхат гирифтанд. Корхонаҳои саноатии кишвар ба мисли «Тоҷиксемент», «Шириниҳои Шарқ», «Шириниҳои Шафоат», фабрикаи ширии «Саодат» ва ғайраҳо аз зумраи корхонаҳои ба даври ҷумҳуриявии озмун роҳхат гирифтаанд.                     Озмун бо ибтикори Агентии стандартизатсия, метрология, сертификат ва нозироти савдои ҷумҳурӣ созмон дода шуда, ҳадафи он дастгирии соҳибкорон, баланд бардоштани истеҳсоли маҳсулоти ватанӣ ва баланд бардоштани иқтидори содиротии кишвар мебошад. Дар озмун корхонаҳое, ки самти фаъолияташонро ба истеҳсоли маҳсулоти озуқворӣ, саноати ҳунарҳои халқӣ ва таъминоти истеҳсоли техникӣ равона кардаанд, иштирок менамоянд. Маҳсулоти беҳтарини корхонаи ғолиб бо ҷоизаю ифтихорномаҳо ва нишонаи маҳсулоти беҳтарини Тоҷикистон сарфароз гардонида мешавад.