ЧАРО ДУХТУРОНИ ҶАВОН ДАР МИНТАҚАҲО КОР НАМЕКУНАНД?

                      Душанбе, 13 июл. (АМИТ «Ховар», Ибодат Давлатова). — Сабаби ба ҷои кор нарафтани хатмкунандагон ин паст будани маоши вазифавӣ, набудани дастгирию ҳавасмандкунии онҳо аз ҷониби мақомоти иҷроияи маҳаллии ҳокимияти давлатӣ мебошад, қайд намуданд 10 июли соли ҷорӣ дар ҷаласаи ҳайати мушовараи Вазорати тандурустии Ҷумҳурии Тоҷикистон.                      Мавзӯи асосии ҷаласаи мазкур то ба ҷои кор рафтани хатмкунандагони соли 2007-2008-и Донишгоҳи давлатии тиббии Тоҷикистон ба номи Абўалӣ ибни Сино буд.                      Тавре иштирокчиёни ҷаласа қайд намуданд, соли 2008 тибқи маълумотномаҳои пешниҳодгардидаи роҳбарони муассисаҳои тандурустӣ миқдори ба ҷои кор рафтани хатмкунандагони солҳои 2007-2008 ба ҳисоби миёна 62.1%-ро ташкил медиҳад ва ин гувоҳи он аст, ки соли гузашта миқдори ба ҷои кор рафтагон 25.1% зиёд шудааст. Умуман аз 595 нафари ба ҷои кор фиристодашуда, 370 нафар ба ҷойҳои кории хеш рафтаанд.                     Дар соли 2008 миқдори ба ҷои кор рафтагонро аз ҳама зиёд дар шаҳри Душанбе (65,6%), ноҳияҳои тобеи ҷумҳурӣ (64,74%), ВМКБ (63,6%) ва аз ҳама кам дар вилояти Хатлон (54,1%) ташкил медиҳад. Ҳол он, ки нишондиҳандаи таъминкунӣ (9.1) ва банд будани штатҳои табибон (64.9) низ аз ҳама кам дар ҳамин вилоят мебошад.                      Нисбат ба солҳои гузашта миқдори хатмкунандагони ба ҷои кор рафта зиёд шуда бошад ҳам, ҳалли масъалаи мазкур андешидани чораҳои заруриро талаб менамояд, қайд намуданд иштирокчиёни ҷаласа.