ИҶРОИ БАРНОМА ШУРӮЪ ШУД

                  Душанбе, 17 июл. (АМИТ «Ховар», Кристина Эрлих ). — Маҷлиси нахустини ситоди амалӣ сохтани барномаи «Рушди соҳибкорӣ — 200 рӯзи ислоҳот» имрӯз дар Кумитаи давлатии сармоягузорӣ ва идораи амволи давлатӣ баргузор гардид. Дар он намояндагони Кумитаи мазкур, вазорату идораҳои дахлдор, соҳибкорону тоҷирон ва хабарнигорон иштирок доштанд. Қайд карда шуд, ки барномаи мазкурро Кумитаи давлатии сармоягузорӣ ва идораи амволи давлат бо иштироки соҳибкорон ва намояндагони созмонҳои байналхалқӣ таҳия намуданд.                 Барномаи мазкурро Ҳукумати ҷумҳурӣ 2 июл тасдиқ намуд. Барнома бо назардошти масъалаҳои муҳимтарини Нақшаи миллии стратегии рушд дар давраи то соли 2015 таҳия гардида, ҳадафи он то ҳадди имкон тезонидани суръати кам кардани сатҳи камбизоатӣ, бартараф сохтани монеаҳои маъмурӣ, кам кардани хароҷоти фаъолияти сармоягузорӣ ва ғайра мебошад. Дар доираи барнома амалӣ сохтани тадбирҳое пешбинӣ карда мешавад, ки ҳадафи онҳо рушди соҳибкорӣ дар мамлакат аст.                  Мухбири АМИТ «Ховар» хабар медиҳад, ки маҷлисҳои ситоди мазкур то пурра иҷро шудани барнома мунтазам гузаронида мешаванд.                                                                                                 Тарҷумон — Қудратов А.