РУШДИ СОҲАИ БОФАНДАГӢ ДАР ТОҶИКИСТОН

                 Душанбе, 7 июл.(АМИТ «Ховар» Дилшодаи Ҷонмард).- Имрӯз дар Душанбе иҷрои барномаи наве шурӯъ мегардад, ки ҳадафи он расонидани кӯмаки техникӣ барои беҳтар сохтани вазъияти соҳаҳои бофандагӣ ва дӯзандгии Тоҷикистон мебошад.                  Агентии давлатии Швейтсария дар умури иқтисод барои иҷрои барнома 1,8 миллион доллари ИМА ҷудо кард. Барномаро Маркази байналмилалии тиҷорат ҳамроҳи вазоратҳои рушди иқтисод ва савдо, энергетикаю саноати Тоҷикистон амалӣ месозанд. Ҳадафи умумии он дастгирӣ намудани рушди устувор ва афзун гардонидани содироти маҳсулоти корхонаҳои Тоҷикистон бо роҳи беҳтар намудани рақобатпазирии маҳсулоти саноатию бофандагӣ ва дӯзандагӣ, фаъолтар гардонидани муассисаҳои ёрирасон ва истеҳсоли бештари маҳсулоти хушсифат мебошад.                    Интихоби соҳаҳои бофандагӣ ва дӯзандагӣ барои давраи саввуми барнома бо он асоснок карда мешавад, ки соҳаи мазкур дорои имконоти воқеии рушд буда, метавонад дар самти гуногунсозии содироти кишвар саҳми муносиб гузорад. Ҳамчунин, дар ин соҳа барои сокинони деҳот, махсусан занон ва дутарон ҷойҳои нави корӣ фароҳам овардан мумкин аст.                    Бояд зикр намуд, ки натиҷаҳои даври дуввуми барномаи пешбурди тиҷорат дар Тоҷикистонро (2006-2008), дар соҳаи коркарди мева ва сабзавот самарабахш номидан мумкин аст. Дастёбии ду ширкати коркарди мева ва сабзавоти Тоҷикистон ба гувоҳномаи байналмилалии ИСО 22000, иштироки корхонаҳои Тоҷикистон дар намоишгоҳҳои байналмилалӣ, омодасозии озмоишгоҳҳои Тоҷикстандарт барои дарёфти иҷозатномаҳои байналмилалӣ, таҳия ва нашри Феҳрасти роҳнамои содиротии Тоҷикистон ва роҳандозии сомонаи интернетии он аз ҷумлаи мисолҳои фаъолияти муваффақонаи барнома дар марҳилаи дуввум мебошанд.