СӮИҚАСД БА ҶОНИ НОМЗАДИ ВАЗИФАИ НОИБИ ПРЕЗИДЕНТИ АФҒОНИСТОН

                Кобул, 27 июл. (АМИТ «Ховар» — Лента. ру.). — Силоҳбадастони ҷунбиши «Толибон» 26 июл дар вилояти Кундуз қатори мошинҳои номзади вазифаи ноиби президенти Афғонистон Муҳаммадқосим Фаҳимро аз гранатомётҳо ва пулемётҳо ҳадафи оташ қарор доданд. Хабар дода мешавад, ки бар асари ин сӯиқасд худи Муҳаммадқосим Фаҳим осеб надид, вале яке аз посбонони ӯ сахт маҷрӯҳ шуд.               Тавре хабар дода шуда буд, баъди як моҳ, 20 август дар Афғонистон интихоботи президент баргузор мегардад.                Ин сӯиқасди дуюм ба ҷони М.Фаҳим мебошад. Силоҳбадастон бори аввал соли 2002 ба муқобили ӯ амалиёт анҷом дода буданд. М.Фаҳим ҳамон вақт дар вазифаи вазири мудофиаи ҳукумати муваққатии Афғонистон кор мекард.                                                                                                    Тарҷумон — Қудратов А.