С. ВАЛИЕВ: «ЗАХИРАИ ЗИЁДИ МАҲСУЛОТ – ГАРАВИ МӮЪТАДИЛИИ НАРХ ДАР БОЗОРҲОСТ»

                       Душанбе, 21 июл. (АМИТ «Ховар», Бекназари Абӯбакр). — «Бо мақсади таъмини аҳолӣ бо ангиштсанг, керосин, гази моеъ ва шамъ дар 928 адад нуқта ва гӯшаҳои фурӯш 2198,1 тонна ангиштсанг, 5,9 тонна керосин, 140,0 ҳазор дона шамъ, 14,1 ҳазор дона чароғи керосинӣ ва ба маблағи 8,4 ҳазор сомонӣ гази моеъ дастраси аҳолӣ гардонида шуд», — зикр намуд дар сӯҳбат бо мухбири АМИТ «Ховар» раиси Раёсати Иттифоқи «Тоҷикматлубот» Сироҷиддин Валиев.                        Ба иттилои раиси «Тоҷикматлубот» то имрӯз барои харид ва захираи 8870 тонна ангиштсанг бо корхонаҳои коркарди ангишт шартномаҳо ба имзо расидааст, ки дар таъмини аҳолӣ ва корхонаҳои саноатӣ дар фасли сармо кифоя мекунад.                        Қобили қайд аст, ки дар натиҷаи ба роҳ мондани хатҳои нави истеҳсолӣ ба маблағи 5,8 миллион сомонӣ молу маҳсулот истеҳсол карда шуд, ки назар ба нимсолаи якуми соли 2008-ум 1,6 миллион сомонӣ зиёд мебошад.                        Имрӯз теъдоди нуқтаҳои қабули маҳсулоти кишоварзӣ дар бозорҳою муасссиаҳои савдо ба 953 адад расидааст, ки назар ба ҳамин давраи соли сипаригашта 316 адад зиёд аст.                        «Махсус таъқид мекунам, ки ба масъалаи харид ва захираи маҳсулоти кишоварзӣ таваҷҷӯҳи зиёд зоҳир мегардад. Аз ин рӯ, ҳаҷми хариди маҳсулоти кишоварзӣ дар нимсолаи аввал ба 37,2 миллион сомонӣ баробар шуд, ки нисбат ба нимсолаи соли 2008-ум 7,3 миллион сомонӣ зиёд аст. Ин метавонад дар давраи зимистони солҳои 2009-2010 ба мӯътадил нигоҳ доштани нархи маҳсулот дар бозорҳои ҷумҳурӣ мусоидат кунад», — тазаккур дод С. Валиев.