СИФАТИ ЛАМПАҲОИ ВОРИДОТӢ САНҶИДА МЕШАВАД

                 Душанбе, 7 июл.(АМИТ «Ховар», Марзия Саидова).-10 июл дар Агентии давлатии стандартизатсия, метрология, сертификатсия ва нозироти савдои ҷумҳурӣ озмоишгоҳи махсуси санҷиши сифати лампаҳои каммасрафи воридотӣ кушода мешавад.                Озмоишгоҳи мазкур бо таҷҳизоти муосир ҷиҳозонида шуда, дар муддатҳои кӯтоҳ ва ба таври дақиқ ҳамагуна навъи лампаҳои каммасрафро дар робита бо талаботи стандартҳои ҷаҳонӣ аз санҷиш мегузаронад. Озмоишгоҳи мазкур дар доираи татбиқи Фармони Президенти ҷумҳурӣ «Дар бораи тадбирҳои иловагии истифодаи сарфаҷӯёнаи энергия» ифтитоҳ карда мешавад.                 Қаблан дар дастгоҳи марказии Агентии Тоҷикстандарт ду озмоишгоҳи сайёри санҷиши лампаҳои каммасраф фаъолият мекард. Инчунин, вақтҳои наздик кушодашавии чунин озмошгоҳҳо дар марказҳои вилоятии Тоҷикстандарт дар назар аст.                 Алҳол, тоҷирони тоҷик бештар аз кишварҳои Россия, Чин ва Туркия лампаҳои каммасраф ворид менамоянд, ки нархи онҳо дар бозорҳои дохилии кишвар аз 6 сомонӣ боло аст.