АМАЛИЁТИ ТЕРРОРИСТӢ ПЕШГИРӢ КАРДА ШУД

                 Урумчи, 10 август. (АМИТ «Ховар» РБК. ру). — Шахсони номаълум 9 август мехостанд ҳавопаймоеро дар шаҳри Урумчии Ноҳияи мухтори Шинҷону Уйғур фуруд оранд, ки пур аз маводи тарканда буд. Дар ин бора намояндаи политсияи низомии ноҳияи мазкур хабар дод. Мақомоти амниятии ноҳия қарор доданд, ки ба фуруди ҳавопаймо дар шаҳри Урумчӣ роҳ дода нашавад.                  Аз рӯи баъзе хабарҳои расида, ҳавопаймои мазкур дар шаҳри Кандаҳори Афғонистон фуруд омад. Ба қавли коршиносон, ин воқеа ба таҳдиди террористони исломӣ ба унвони мақомоти Чин вобаста мебошад. Чанде пеш созмони террористии «Ҳизби исломии Туркистон» таҳдид карда буд, ки қасоси уйғурҳои мусулмони дар Урумчи ҳалокгардидаро меситонад.                 Қумондони дастаи силоҳбадастони ҳизби мазкур «қумондон Сайфулло» мебошад. Вай таҳдид карда буд, ки «саворони Оллоҳ ба қарибӣ қотилони мусулмонони чиниро ба азобу шиканҷа гирифтор хоҳанд кард».                 Хабар дода мешавад, ки вазъияти ноҳияи Мухтори Шинҷону Уйғур мисли пештара ноором ва муташанниҷ мебошад. Кормандони политсияи Чин чанд рӯз пеш дар Урумчи ду марди уйғурро парронданд, ки бо корду калтак ба як нафари дигар ҳамла оварда буданд. Қобили зикр аст, ки марди осебдида низ уйғур буд. Тарҷумон — Қудратов А.