ХАДАМОТИ ШУҒЛИ АҲОЛӢ 2 ҲАЗОР НАФАРРО БА КОР ТАЪМИН КАРД

                Душанбе, 11 август. (АМИТ «Ховар», Лаззат Диловарзод).- Дар аввали моҳи июли соли 2009 дар Хадамоти шуғли аҳолӣ беш аз 59 ҳазор нафар корталаб дар қайд буд, ки нисбат ба ҳамин давраи соли 2008 — ум 12,7 фоиз кам ва нисбат ба сатҳи моҳи апрели соли 2009 — ум 0,7 фоиз зиёд мебошад.                Бино ба иттилои хадамоти мазкур, дар моҳи июни соли 2009 — ум 7,5 ҳазор нафар ба Хадамоти шуғли аҳолӣ оид ба таъмини кор муроҷиат намуданд, ки ин нисбат ба ҳамин давраи соли 2008 — ум 1,9 баробар зиёд аст.                Дар ин давра 2 ҳазор нафар бекорон тавассути гузаронидани ярмаркаҳои ҷойҳои холии кор ба ҷойи кори доимӣ таъмин шуданд, ки ин танҳо 27 фоизи шумораи ба кор муроҷиаткунандагонро ташкил медиҳад.