ЗАДУХӮРДИ МАРДИКОРОНИ ТОҶИКИСТОНУ ҚАЛМИҚИСТОН ДАР МАСКАВ

                     Маскав, 3 август. (АМИТ «Ховар» — Регнум.ру). — Рӯзи якшанбе дар қисмати ҷанубу ғарбии шаҳри Маскав задухӯрди мардикорони тоҷик ва қалмиқ рух дод. Дар он қариб 20 нафар иштирок дошт.                     Задухӯрд дар наздикии бинои № 40 — и кӯчаи Профсоюзная сар шуд. Муноқишакунандагон чанд лаҳза пеш аз омадани кормандони милиса пароканда шуданд. Ба милиса муяссар нашуд, ки иштирокчиёни задухӯрдро дастгир намояд.                     Дар натиҷаи задухӯрд як мардикори тоҷик маҷрӯҳ шуд Ӯро фавран ба шифохона бурданд. Ба қавли кормандони милиса алҳол сабаби задухӯрд маълум нест.                    Чунин задухӯрду муноқишаҳо байни мардикорони хориҷӣ дар Маскав зуд — зуд рӯй медиҳанд. Тақрибан як моҳ пеш дар округи ҷанубу шарқии Маскав мардикорони Ӯзбекистон бо сокинони маҳаллӣ муноқиша карданд. Он вақт се нафар маҷрӯҳ гашта буд.                     Охири соли гузашта дар ҳудуди шифохонаи клиникии бемориҳои руҳии ба номи Ганнушкин ҷанҷоли калон рух дод. Ҳамон вақт бинокорони хориҷие, ки дар сохтмон кор мекарданд, бо кормандони шифохона аввал муноқиша карда, баъд дастбагиребон шуданд.                     Дар натиҷаи задухӯрди мусаллаҳонаи моҳи сентябр дар наздикии ноҳияи Солнечногорск рухдода, ду нафар кушта ва ҳафт нафар маҷрӯҳ шуд. Дар ин ҷо мардикорони ӯзбек бо сокинони деҳаи Лунево муноқиша карда буданд.                                                                                                       Тарҷумон — Қудратов А.